Ռուսաստանը չի ընդունի Ֆինլանդիայի և Շվեդիայի մուտքը ՆԱՏՕ․ ՌԴ փոխարտգործնախարար

Ռուսաստանը պարզապես չի համակերպվի Ֆինլանդիայի և Շվեդիայի՝ ՆԱՏՕ-ին անդամակցելու հետ, ասել է ՌԴ փոխարտգործնախարար Սերգեյ Ռյաբկովը՝ կոչ անելով Արևմուտքին այս հարցում պատրանքներ չունենալ։
«Ռազմական լարվածության ընդհանուր մակարդակը կավելանա, իսկ կանխատեսելիությունն այս ոլորտում կնվազի: Ցավալի է, որ ողջախոհությունը զոհաբերվում է ինչ-որ ուրվական գաղափարների, թե ինչ պետք է անել ներկա իրավիճակում»,- ընդգծել է դիվանագետը, գրում է Ռիա Նովոստին։

ՌԴ փոխարտգործնախարարը պարզաբանել է, որ այս իրավիճակը Շվեդիայի և Ֆինլանդիայի ղեկավարության սխալն է՝ հեռահար հետևանքներով, ինչը ցույց է տալիս այս երկրներում որոշումներ կայացնողների մակարդակը։

«Մենք իրավիճակը դիտարկում ենք՝ որպես ամբողջություն, որն, իհարկե, արմատապես փոխվում է տեղի ունեցողի ֆոնին, վերջին շրջանում մեր կողմից տարբեր մակարդակներում մեկնաբանություններ են արվում, այս ամենը լրիվ Արևմուտքի և, մասնավորապես, Հյուսիսային Եվրոպայի երկրների քաղաքականություն մշակողների կողմից աշխարհում տեղի ունեցողի խեղաթյուրված ընկալումն է, կեղծիքի արտացոլումը, այն փաստը, որ Շվեդիայի անվտանգությունը, ինչպես Ֆինլանդիայինը, չի ամրապնդվի այս որոշման արդյունքում, մեզ համար միանգամայն ակնհայտ է»,- ասել է Ռյաբկովը։

Նա հավելել է, որ այն, թե կոնկրետ ինչպես Ռուսաստանը կապահովի իր անվտանգությունը ՆԱՏՕ-ի ընդհանուր կոնֆիգուրացիայի փոփոխությունից հետո, առանձին հարց է։ ՌԴ֊ի որոշումը կախված կլինի նրանից, թե կոնկրետ ինչ հետևանքների կհանգեցնի երկու երկրների անդամակցությունը Հյուսիսատլանտյան դաշինքին։