Ուկրաինայում տիրող իրավիճակի մասին թարմացում` տարածաշրջանային իշխանությունների կողմից

Մայիսի 17-ի դրությամբ BBC լրատվամիջոցը ներկայացրել է Ուկրաինայում տիրող իրավիճակի մասին թարմացում` տարածաշրջանային իշխանությունների կողմից։

Լուգանսկի մարզում ռուսական զորքերը երկու հզոր ավիահարված են հասցրել և շարունակել հրետակոծությունները ողջ տարածքում, հաղորդում է շրջվարչակազմը։ Սևերոդոնեցկում ավերվել են հիվանդանոցի երկու շենք և գիտաարտադրական ասոցիացիայի շենք։ 10 մարդ մահացել է, երեքը՝ վիրավորվել։

Դոնեցկի մարզում ռուսական զորքերը զանգվածային հրետակոծություններ են իրականացնում առաջնագծի ողջ երկայնքով. վերջին 24 ժամվա ընթացքում ութ մարդ զոհվել է, վեցը` վիրավորվել, տասնյակ բնակելի շենքեր վնասվել են։

Խարկովում գիշերն անցել է առանց հրետակոծության, սակայն օրվա ընթացքում ռուսական զորքերը կրակ են բացել Խարկովի և Չուգուեւի շրջանների բնակավայրերի ուղղությամբ։ Ընդամենը մեկ օրում Խարկովի մարզում վիրավորվել է 9 մարդ, երկուսը մահացել են։

Չերնիգովի շրջանում առավոտյան ժամը 5-ին ռուսական զորքերը հրթիռային հարված են հասցրել Դեսնա գյուղին։ Ըստ նախնական տեղեկությունների՝ կան զոհեր և վիրավորներ։

Սումիի շրջանում ռուս զինվորականները հինգ հրթիռային հարձակում են գործել Ախտիրկայի վրա՝ վնասվել են մանկապարտեզ, մասնավոր և բազմահարկ շենքեր։ Առնվազն երեք մարդ վիրավորվել է։

Լվովի մարզում ռուսական հրթիռը հարվածել է Յավորիվ շրջանում գտնվող ռազմական օբյեկտին. Զոհեր և վիրավորներ չկան։ Ըստ նախնական տեղեկությունների՝ հակաօդային պաշտպանության ուժերը երեք թեւավոր հրթիռ են խոցել։

Միևնույն ժամանակ, գիշերը համեմատաբար հանգիստ է անցել Վոլին, Անդրկարպատյան, Ռիվնե, Իվանո-Ֆրանկիվսկ, Չեռնովցի, Օդեսայում, Վիննիցայում և այլ շրջաններում։