Արևմուտքը կարող է չեղարկել ռուս գործարարների նկատմամբ պատժամիջոցները՝ Ուկրաինային օգնության դիմաց․ Associated Press

Արևմուտքը քննարկում է ռուս գործարարներին «պատժամիջոցները մարելու» հնարավորություն տալ՝ Ուկրաինայի վերականգնման համար գումար ուղարկելու դիմաց, հայտնում է AP-ն՝ հղում անելով աղբյուրներին։ Նրանց խոսքով՝ առաջարկը նախաձեռնել է Կանադայի ֆինանսների փոխնախարար Քրիստիա Ֆրիլանդը՝ այն բանից հետո, երբ նա քննարկել է իր գաղափարը «ռուս օլիգարխների» հետ։

AP-ն գրում է, որ այս առաջարկն արվել է G7 երկրների ֆինանսների նախարարների հանդիպմանը, որը տեղի է ունեցել անցյալ շաբաթ՝ Գերմանիայում։ Երիտասարդ Քրիստիա Ֆրիլանդն աշխատել է՝ որպես Financial Times-ի մոսկովյան բյուրոյի ղեկավար, և դրա շնորհիվ, ինչպես պարզաբանում է գործակալությունը, նա «ծանոթ է որոշ ռուս օլիգարխների հետ», թե հատկապես ոււմ հետ, հայտնի չէ։

Անանուն աղբյուրը AP-ին հայտնել է, որ այս նախաձեռնությունն արդեն քննարկվել է ուկրաինական կողմի հետ։ Գործակալության զրուցակցի խոսքով՝ այս պահին «սա ընդամենը գաղափար է», սակայն դրա հանդեպ հետաքրքրություն են ցուցաբերել արևմտյան երկրները։

Գործարարները հայտնվել են պատժամիջոցների տակ, որոնք սահմանվել են՝ ի պատասխան Ուկրաինայում ռուսական ռազմական գործողության։ Պատժամիջոցների շրջանակում Եվրամիությունը 10 միլիարդ եվրոյով սառեցրել է ռուսաստանցիների ակտիվները։ Այդ գումարը ներառում է սառեցված անշարժ գույքի, արժեթղթերի, զբոսանավերի և մեքենաների արժեքը։ ԵՄ-ն նաև սառեցրել է Ռուսաստանի Դաշնության Կենտրոնական բանկի ակտիվները։ Եվրոպական դիվանագիտության ղեկավար Ժոսեֆ Բորելն առաջարկել է հանել այդ ակտիվները՝ հօգուտ Ուկրաինայի։