Շվեդիան և Ֆինլանդիան առաջընթաց չեն գրանցել Թուրքիայի հետ ՆԱՏՕ-ի բանակցություններում. Reuters

Շվեդ և ֆին դիվանագետները քիչ առաջընթաց են գրանցել երկու երկրների՝ ՆԱՏՕ-ին անդամակցելու վերաբերյալ Թուրքիայի առարկությունների հաղթահարման հարցում, հայտնում է Reuters-ը՝ վկայակոչելով աղբյուրներին: Գործակալության տվյալներով՝ Շվեդիայի և Ֆինլանդիայի պատվիրակությունների բանակցությունները թուրք պաշտոնյաների հետ էական արդյունքների չեն հանգեցրել, և հայտնի չէ, թե երբ կշարունակվեն քննարկումները։

Reuters-ի փոխանցմամբ՝ թուրքական կառավարության աղբյուրները բանակցություններն անվանում են բարդ գործընթաց՝ մատնանշելով Ստոկհոլմի և Հելսինկիի համար «դժվար քայլերի» անհրաժեշտությունը, եթե նրանք ցանկանում են հասնել Անկարայի դիրքորոշման փոփոխության։ Թուրքական կողմի առանցքային պահանջներից է Քրդստանի աշխատավորական կուսակցության «ահաբեկիչներին» ապաստան տրամադրելուց հրաժարվելը և Թուրքիային զենք մատակարարելու սահմանափակումների վերացումը, որը սահմանվել էր սիրիացի քրդերի դեմ գործողության համար։

Միաժամանակ գործակալությունը նշում է, որ բանակցությունների շարունակման վերջնաժամկետի բացակայությունը վտանգ է ստեղծում, որ Անկարան կարգելափակի երկու պետությունների դիմումը ՆԱՏՕ-ի գագաթնաժողովի ժամանակ, որը նախատեսված է հունիսի 29-30-ը Մադրիդում։