Եղիսաբեթ II-ը կբարձրացնի պալատում աշխատակիցների աշխատավարձը․ The Telegraph

Անգլիայի Եղիսաբեթ 2-րդ թագուհին 5%-ով կբարձրացնի պալատի աշխատակիցների աշխատավարձը՝ օգնելու հաղթահարել ճգնաժամը և գնաճը, որը կհամընկնի իր պլատինե հոբելյանի հետ: Այս մասին հայտնում է The Telegraph թերթը՝ հղում անելով պալատի աղբյուրին։

Դա «հոբելյանական բոնուս չէ, դա բոլորի քրտնաջան աշխատանքի ճանաչումն է վերջին երկու տարիների ընթացքում»,- ընդգծում է աղբյուրը։ Բրիտանական թագուհին որոշել է բարձրացնել իր անձնակազմի աշխատավարձերը՝ շնորհակալություն հայտնելու աշխատակիցներին համաճարակի ժամանակ կատարած քրտնաջան աշխատանքի և Էդինբուրգի դուքսի հուղարկավորությունը կազմակերպելու համար։ Պալատի աղբյուրը մանրամասնել է, որ «աշխատակիցները կստանան աշխատավարձի նվազագույնը 2,5 տոկոսի բարձրացում, որը կարող է աճել մինչև 5 տոկոս՝ կախված նրանց անձնական կատարողականությունից:

Հայտնի է, որ պալատի լրիվ դրույքով աշխատողներն ավելի ցածր աշխատավարձ են ստանում բրիտանացի մյուս աշխատակիցների համեմատ։ Ազգային վիճակագրական ծառայության տվյալներով՝ պալատի աշխատակիցների միջին տարեկան աշխատավարձը 2020 թվականին կազմել է 27,7 հազար ֆունտ (34,6 հազար դոլար), մինչդեռ Միացյալ Թագավորության այլ աշխատակիցների միջին տարեկան աշխատավարձը գնահատվել է 31,5 հազար ֆունտ (39,4 հազար դոլար):

Եղիսաբեթ II-ի գահին լինելու 70-ամյակի, ինչպես նաև այս տարի նշվող միապետի 96-ամյակի կապակցությամբ հանդիսավոր միջոցառումները կսկսվեն հունիսի 2-ին։ Տոնական միջոցառումների գագաթնակետը կլինի հունիսի 5-ին նախատեսված շքերթը, որին կմասնակցի 10 հազար մարդ, որոնց թվում կլինեն հայտնիներ։ Երթը կսկսվի Վեսթմինսթերյան աբբայության զանգերի ղողանջի ներքո, որտեղից դրա մասնակիցները կշարժվեն Բուքինհեմյան պալատ։