ՆԱՏՕ-ի երկրները զորավարժություններ կանցկացնեն Բալթիկ ծովում

Բալթիկ ծովի տարածաշրջանում հունիսի 5-ից հունիսի 17-ը կանցկացվեն Baltops ամենամյա միջազգային զորավարժությունները, որոնց կմասնակցի 16 երկիր, հայտնում է BNS-ը՝ վկայակոչելով Լատվիայի պաշտպանության նախարարությանը։

Ինչպես հաղորդվում է, զորավարժություններին կմասնակցեն ՆԱՏՕ-ի 14 երկրներ՝ ԱՄՆ, Բելգիա, Բուլղարիա, Դանիա, Էստոնիա, Ֆրանսիա, Գերմանիա, Լատվիա, Լիտվա, Մեծ Բրիտանիա, Նիդեռլանդներ, Նորվեգիա, Լեհաստան, Թուրքիա։ Դրանցում կներգրավվեն նաեւ դաշինքի գործընկեր երկրները՝ Շվեդիան եւ Ֆինլանդիան։

Զորավարժությունների մասնակիցները կցուցաբերեն իրենց պատրաստակամությունը Բալթյան տարածաշրջանում կոլեկտիվ պաշտպանություն ապահովելու և զսպման քաղաքականություն իրականացնելու համար, ասվում է զեկույցում։

Լատվիայի տարածքային ջրերում դաշնակիցների նավերի, ինքնաթիռների և զրահատեխնիկայի մասնակցությամբ կիրականացվեն մի քանի մարտավարական գործողություններ:

Baltops զորավարժությունները խոշորագույններից են Հյուսիսային Եվրոպայում: Ի պատիվ Շվեդիայի ռազմածովային ուժերի 500-ամյակի՝ զորավարժությունները կմեկնարկեն Ստոկհոլմում։ Դրանից հետո մարտավարական զորավարժություններ կանցկացվեն Բալթիկ ծովի ջրերում եւ տարածաշրջանի օդային տարածքում։ Զորավարժությունը կավարտվի Քիլում (Գերմանիա):

Զորավարժություններին կմասնակցեն ավելի քան 4000 զինվորներ, ինչպես նաև ծովային դեսանտներ, ավելի քան 60 ինքնաթիռ և տարբեր դասերի 40 նավ, որոնք ցույց կտան դաշինքի միացյալ ուժերի` արագ արձագանքման, Բալթիկ ծովի նկատմամբ վերահսկողության և կարճ ժամանակում նշված տարածաշրջանի ցանկացած կետ մեծ ռազմական ուժեր տեղափոխելու հնարավորության պատրաստակամությունը։