Էրդողանը չի կարող առաջադրվել երրորդ նախագահական ժամկետի համար. ԶԼՄ

Թուրքիայի գործող նախագահ Ռեջեփ Թայիփ Էրդողանը չի կարող առաջադրվել որպես թեկնածու 2023 թվականի հունիսին նշանակված նախագահական ընտրություններում, երեքշաբթի գրում է Cumhuriyet թերթը։

Թուրքիայի հիմնական օրենքում 2017 թվականի հանրաքվեի ժամանակ ընդունված փոփոխությունների համաձայն՝ նույն անձը չի կարող երկու անգամից ավել նախագահել։ Թերթը նշում է, որ Էրդողանը նախագահ է ընտրվել երկու անգամ՝ 2014 և 2018 թվականներին, ուստի ընտրություններին վերընտրվելու նրա որոշումը հակասում է սահմանադրության 101-րդ հոդվածին։

Cumhuriyet-ի սյունակագիր Էմրե Կոնգարը հիշեցնում է, որ Թուրքիայի սահմանադրության 116-րդ հոդվածի համաձայն՝ երկրորդ ժամկետով ընտրված նախագահը կարող է կրկին առաջադրվել, եթե խորհրդարանը որոշի «թարմացնել ընտրությունները»։ Նրա օգտին պետք է քվեարկեն 600 տեղանոց խորհրդարանի 360 պատգամավոր, սակայն Էրդողանի գլխավորած իշխող «Արդարություն և զարգացում» կուսակցությունը (ԱԶԿ) և նրան աջակցող «Ազգայնական շարժում» կուսակցությունն այդքան մանդատ չունեն։

«Այսպիսով, Էրդողանին երրորդ անգամ իր թեկնածությունը առաջադրելու համար անհրաժեշտ է ստանալ ընդդիմության աջակցությունը»,- գրում է սյունակագիրը՝ նշելով, որ այս դեպքում կարելի է խոսել միայն արտահերթ ընտրությունների մասին։

Այնուամենայնիվ, Էրդողանի կուսակցությունը պնդում է, որ իրենց ղեկավարի՝ երրորդ նախագահական ժամկետով առաջադրման համար իրավական խոչընդոտներ չկան։ ԱԶԿ-ն նշում է, որ երկրում նախագահական կառավարման ձևի ներդրման վերաբերյալ սահմանադրության փոփոխությունների ընդունումից հետո Էրդողանը ընտրություններին մասնակցել է միայն մեկ անգամ, ուստի 2023 թվականին նա կարող է կրկին առաջադրվել։

Նախագահն էլ անցյալ շաբաթ ասել էր, որ Թուրքիայում արտահերթ ընտրություններ չեն լինելու, դրանք կանցկացվեն 2023 թվականի հունիսին, ինչպես նախատեսված է օրենքով։