Դոնբասում օրական մինչև 1000 ուկրաինացի զինվոր է սպանվում կամ վիրավորվում. Զելենսկու խորհրդական

Դոնբասում օրական մինչև 1000 ուկրաինացի զինվոր է սպանվում կամ վիրավորվում, և 200-500 մարդ է մահանում։ Այս մասին ԱՄՆ կատարած այցի ժամանակ հայտարարել է Գերագույն ռադայում «Ժողովրդի ծառա» խմբակցության ղեկավար և Ռուսաստանի հետ խաղաղ բանակցություններում ուկրաինական պատվիրակության ղեկավար Դավիթ Արախամիան, փոխանցում է Axios-ը։

Արախամիայի խոսքով՝ վերջին երկու շաբաթվա ընթացքում զոհերի թիվը զգալիորեն աճել է։ Մայիսի վերջին Ուկրաինայի նախագահ Վոլոդիմիր Զելենսկին հայտարարել էր, որ երկիրը Դոնբասում օրական կորցնում է 60-100 մարդ և 500 վիրավոր է ունենում։

Չնայած կորուստներին՝ Ուկրաինան պայքարելու ուժ ունի Դոնբասում, կարծում է Արախամիան։ Նրա խոսքով՝ Ուկրաինան մեկ միլիոն մարդ է մոբիլիզացրել բանակում և կարող է մոբիլիզացնել ևս երկու միլիոն, սակայն նրանց պետք է զինել։ «Մենք ունենք հարձակման, հակահարձակման համար պատրաստված մարդիկ, բայց դրա համար անհրաժեշտ է զենք»,- ասել է նա։
Արախամիան նաև նշել է, որ ուկրաինական բանակցային խմբի անդամները շաբաթական զանգահարում են իրենց ռուս գործընկերներին, սակայն «երկու կողմերն էլ հստակ գիտակցում են, որ այժմ բանակցությունների տեղ չկա»։ «Մեր բանակցային դիրքորոշումն իրականում բավականին թույլ է, ուստի մենք չենք ցանկանում նստել բանակցությունների սեղանի շուրջ մինչև այն չփոխվի», - պարզաբանել է Արախամիան։