ԱՄՆ-ն պատրաստվում է Ուկրաինայում երկարատև պատերազմի․ Washington Post

ԱՄՆ-ն ու նրա դաշնակիցները պատրաստվում են Ուկրաինայում տևական պատերազմի, գրում է Washington Post-ը՝ հղում անելով իր աղբյուրներին։ Ըստ  հրապարակման Պետդեպարտամենտի զրուցակիցներից մեկի՝ Սպիտակ տունը քննարկել է երկարատև ռազմական գործողությունների հնարավորությունը նույնիսկ ռուսական «հատուկ գործողության» մեկնարկից առաջ, երբ ԶԼՄ-ները սկսեցին հաղորդել պատերազմի հավանականության մասին։

Պաշտոնյան պարզաբանել է, որ Ուկրաինային ամերիկյան զենքի մատակարարումների ավելացումը ուղղված է հենց ռազմական գործողությունների երկարաձգմանը։ Վաշինգտոնը փորձում է ստիպել Մոսկվային հրաժարվել շարունակել դրանք և միևնույն ժամանակ ամրապնդել Կիևի դիրքերը խաղաղ բանակցություններում։

Պետդեպարտամենտի պաշտոնյայի խոսքով՝ ԱՄՆ վարչակազմը ելնում է նրանից, որ Ռուսաստանի՝ Ուկրաինայում իր նպատակներին հասնելը «շատ վատ» կլինի ԱՄՆ-ի, նրա դաշնակիցների և միջազգային հանրության համար, գրում է РБК-ն։

Միացյալ Նահանգները, ինչպես նաև ԵՄ երկրները, Ավստրալիան, Կանադան Ուկրաինային արդեն հասցրել են ռազմական օգնության մի քանի փաթեթ տրամադրել։ Հունիսի սկզբին ԱՄՆ իշխանությունները հայտարարեցին, որ Ուկրաինային կտրամադրեն HIMARS MLRS, այլ զենք ու զինամթերք և սարքավորումներ՝ 700 միլիոն դոլար արժողությամբ ռազմական օգնության փաթեթի շրջանակներում։ Միևնույն ժամանակ, Մոսկվան ընդգծում է, որ Ուկրաինայում «ռազմական գործողության» նպատակները կիրականանան՝ չնայած Կիևին արևմտյան զենքով զինելուն։