Միակ բանը, որ նա հասկանում է, ուժն է․ Մեծ Բրիտանիայի նախկին վարչապետը պնդում է՝ Պուտինը սպառնացել է իրեն

Մեծ Բրիտանիայի նախկին վարչապետ Բրաունը հիշել է, թե ինչպես են իրեն ստիպել Պուտինին «ներքևից վերև» նայել, գրում է Gazeta-ն։
Մեծ Բրիտանիայի կառավարության նախկին ղեկավար Գորդոն Բրաունը, իր խոսքերով, «երբեք պատրանքներ չի ունեցել Պուտինի մասին»։ Քաղաքական գործիչը The Telegraph-ին տված հարցազրույցում կիսվել է 2006 թվականին Մոսկվա կատարած իր այցի մասին հիշողություններով, որտեղ իրեն նստեցրել են «շատ ցածր աթոռի վրա»։

«Այնպես, որ ես նայում էի Պուտինին «ներքևից վերև», թեև նա, իհարկե, ցածրահասակ տղամարդ է և կրում է այդ բարձրակրունկները»,֊ասել է Բրաունը։
«Այդ օրը նա հանեց այդ ցուցիչ քարտերը և սկսեց կարդալ իմ մասին ունեցած ամբողջ տեղեկատվությունը։ Կարծես ուզում էր ապացուցել, որ նա իմ մասին ավելին գիտի, քան ես։ Հետևաբար, երբ մարդիկ ասում են, որ Պուտինը փոխվել է և միայն հիմա է սպառնում, կարող եմ ասել, որ նա ինձ սպառնացել է նույնիսկ այն ժամանակ»,- ասել է Մեծ Բրիտանիայի կաբինետի նախկին ղեկավարը։ 

Նա հայտարարել է, որ ՌԴ նախագահը «արձագանքում է միայն անզիջում ուժի ցուցադրմանը»։ Բրաունը նաև պնդել է, որ Ռուսաստանի առաջնորդ Վլադիմիր Պուտինը սպառնացել է իրեն։ Նրա խոսքով՝ երկար տարիներ Արևմուտքը չէր կարող դիմակայել Ռուսաստանի Դաշնության նախագահին՝ մինչև «նրա ներխուժումն Ուկրաինա»։

Բրաունը նաև քննադատել է գլոբալ անմիաբանությունը՝ նշելով, որ աշխարհի 150 երկրներ պատժամիջոցներ չեն կիրառել Ռուսաստանի դեմ նույնիսկ հատուկ ռազմական գործողության մեկնարկից հետո։