ՆԱՏՕ-ն պետք է պատրաստ լինի միջուկային զենք կիրառելուն. Բեռլին

ՆԱՏՕ-ն պետք է պատրաստ լինի Ռուսաստանի Դաշնության միջուկային սպառնալիքներին և զսպիչ հարվածին: Այս մասին հայտարարել է Գերմանիայի ռազմաօդային ուժերի հրամանատար, գեներալ Ինգո Գերհարցը՝ ելույթ ունենալով Կիլում ընթացող Միջազգային ռազմածովային ուժերի սիմպոզիումում, հայտնում է Bild-ը։

«Վստահելի զսպող միջոցի համար մեզ անհրաժեշտ են և՛ միջոցներ, և՛ քաղաքական կամք՝ անհրաժեշտության դեպքում միջուկային զսպող միջոց ստեղծելու համար», - ասել է գեներալը:

Հրատարակության համաձայն՝ ավելի հասկանալի լեզվով Գերհարցը նկատի է ունեցել հետեւյալը՝ անհրաժեշտության դեպքում ՆԱՏՕ-ի երկրները պետք է պատրաստ լինեն միջուկային զենք կիրառել, եթե դա առաջինը անի Ռուսաստանը։

Մեկնաբանելով ՆԱՏՕ-ի վրա Ռուսաստանի ներխուժման հավանականությունը՝ գեներալն ասել է. «Պուտին, հեռու մնա մեզանից»։ Գերմանիայի ռազմաօդային ուժերի հրամանատարն ընդգծել է, որ «մինչև 2030 թվականը եվրոպացիները Բալթիկ ծովի տարածաշրջանում կունենան ավելի քան 600 ժամանակակից կործանիչ։ Հետո կան նաև ամերիկյան ինքնաթիռներ»։