Իսրայելը սաստկացնում է գաղտնի պատերազմն Իրանի հետ՝ չխորհրդակցելով ԱՄՆ-ի հետ. CNN

Իսրայելն ուժեղացրել է Իրանի դեմ գաղտնի հարվածները և չի խորհրդակցում ԱՄՆ-ի հետ: Այս մասին CNN-ին հայտնել են ԱՄՆ վարչակազմի նախկին ու ներկա բարձրաստիճան պաշտոնյաները իրանցի ռազմական ինժեներների առեղծվածային մահվան մասին մի շարք հաղորդումների ֆոնին։

«Իրանում իրավիճակը ծայրաստիճան լարվել է»,-ասել է ԱՄՆ-ի վարչակազմի պաշտոնյան ԱՄՆ նախագահ Ջո Բայդենի՝ Իսրայել, Պաղեստին և Սաուդյան Արաբիա այցից երեք շաբաթ առաջ, գրում է իսրայելական Vesty.co.il-ը։

Ըստ ամերիկյան հեռուստատեսության աղբյուրների` նրանց մոտ տպավորություն է ստեղծվում, որ Իսրայելն ավելի ու ավելի է փորձում իր վերահսկողության տակ առնել իրանական խնդիրը, և որ իսրայելական հետախուզական ծառայություններն ուժեղացրել են թաքնված հարձակումները իրանցի մասնագետների և իրանական միջուկային օբյեկտների դեմ՝ ԱՄՆ-ին թողնելով անտեղյակության մեջ:

Աղբյուրները հավելում են, որ Բայդենը պատրաստվում է խորհրդակցել Մերձավոր Արևելքում իր դաշնակիցների հետ, թե էլ ինչ կարելի է անել Իրանի միջուկային սպառազինությունների մրցավազքը դադարեցնելու համար։

Իսրայելական հրատարակությունը հիշեցնում է, որ վերջին ամիսներին Իրանում հրթիռային և միջուկային նախագծերում ներգրավված մարդկանց մի քանի տարօրինակ մահվան դեպքեր են գրանցվել։ Հունիսի 13-ին իրանական լրատվամիջոցները հայտնել են, որ Իսլամական հեղափոխության պահապանների կորպուսի օդուժի սպա Ալի Քամանին մահացել է հանձնարարականի ժամանակ։ Մեկ ժամ անց հայտնի դարձավ մեկ այլ մահվան մասին՝ գիտնական Մուհամմեդ Աբեդոսը, ով աշխատում էր արբանյակներ և բալիստիկ հրթիռներ մշակող ընկերությունում։ Այուբ Էնթեզարին, ով մասնագիտացել էր ավիացիոն ճարտարագիտության մեջ, մահացել է առեղծվածային հանգամանքներում հունիսի 4-ին։ Ըստ իրանական մամուլի՝ նա մահացել է սննդային թունավորումից։ Ավելի ուշ Իրանի որոշ լրատվամիջոցներ հայտնել են նաև միջուկային գիտնական Քամրան Մալապուրի մահվան մասին, ով աշխատում էր Նաթանզի միջուկային ռեակտորում։