ԱՄՆ-ն Ուկրաինայի վերաբերյալ «անկեղծ զրույց» կունենա Չինաստանի հետ

ԱՄՆ պետքարտուղար Էնթոնի Բլինկենը Ինդոնեզիայում կայանալիք գագաթնաժողովի ժամանակ «անկեղծ քննարկում» կունենա ուկրաինական պատերազմի մասին իր չինացի գործընկեր Վան Յիի հետ։ Այս մասին հուլիսի 6-ին հայտնել է Bloomberg-ը։

Նշվում է, որ պետքարտուղարության ղեկավարը չորեքշաբթի օրը թռչում է Բալի՝ մասնակցելու G20-ի երկրների արտգործնախարարների հանդիպմանը։ Դրանից հետո նա կմեկնի Թաիլանդ։

Գործակալության տվյալներով՝ միջոցառմանը գերիշխելու է «ռուսական ռազմական ներխուժման հետևանքների» թեման։

«G20 ֆորումում Բլինկենը կկենտրոնանա Ռուսաստանի ներխուժման և ուկրաինական հացահատիկի արտահանման շրջափակման դերի վրա՝ սնուցելու համաշխարհային պարենային ճգնաժամը»,֊ասել է պետքարտուղարի տնտեսական և բիզնեսի հարցերով օգնական Ռամին Տոլուին:

Պետքարտուղարության ղեկավարի և Չինաստանի ներկայացուցչի բանակցությունները նախատեսված են շաբաթ օրը՝ հուլիսի 9-ին։