Ռուսաստանում հաստատվել է «Կապիկի ծաղիկի» առաջին դեպքը

Ռուսաստանում հաստատվել է «Կապիկի ծաղիկի» առաջին դեպքը: Այս մասին Lenta.ru-ին հայտնել են Ռոսպոտրեբնադզորից։ Գործակալության տվյալներով՝ վարակը հայտնաբերվել է ռուսաստանցու մոտ, ով երկիր է վերադարձել Եվրոպա կատարած ուղևորությունից։ Վերադառնալուց հետո նա հիվանդությանը բնորոշ ցան է ունեցել:

Ռոսպոտրեբնադզորը նշել է, որ հիվանդի շփումների շրջանակը սահմանափակ է եղել, փորձագետները ուշադիր հետևում են բոլորի վիճակին, ովքեր շփվել են վարակվածի հետ։ Նրա հիվանդությունն ընթանում է թեթև, կյանքին վտանգ չի սպառնում։

«Համաճարակաբանական հետաքննությունը ժամանակին սկսելու շնորհիվ դադարեցվել է վարակի հետագա տարածման հնարավորությունը։ Իրավիճակը գտնվում է Ռոսպոտրեբնադզորի խիստ հսկողության ներքո»,- Lenta.ru-ին հայտնել են գերատեսչությունից:

Ավելի վաղ Ռուսաստանի գիտությունների ակադեմիայի ակադեմիկոս, բժշկական գիտությունների դոկտոր, համաճարակաբան Վադիմ Պոկրովսկին կանխատեսել էր, որ ռուսաստանցիների շրջանում վարակի մեկուսացված դեպքեր կհայտնաբերվեն հուլիսին կամ օգոստոսին։ Նա նշել էր, որ արտերկրից վերադարձողների թվում կլինեն վարակակիրներ։

«Կապիկի ծաղիկի» առաջնային նշաններն են ջերմությունը, ուժեղ գլխացավը, մկանային, մեջքի ցավերը, ավշային հանգույցների այտուցվածությունը, դողը և հյուծվածությունը: Հիվանդությունը կարող է տևել երկուսից չորս շաբաթ:

«Կապիկի ծաղիկի» դեպքեր արդեն հայտնաբերվել են 59 երկրներում, ընդհանուր դեպքերի թիվը գերազանցել է 9 հազարը։