Շոյգուն ժամանել է Ստամբուլ՝ բանակցությունների

Ռուսաստանի պաշտպանության նախարար Սերգեյ Շոյգուն ուրբաթ օրը՝ հուլիսի 22-ին, ժամանել է Ստամբուլ՝ համաձայնագիր ստորագրելու սեւծովյան նավահանգիստներից ուկրաինական հացահատիկի փոխադրման վերաբերյալ։ Այս մասին հայտնում է Haber Turk հեռուստաալիքը։

Նշվում է, որ թուրքական կողմից համաձայնագիրը ստորագրելու է պաշտպանության նախարար Հուլուսի Աքարը։

Ինչպես հայտնում է TRT-ն, համաձայնագրի ստորագրման արարողությունը տեղի կունենա ժամը 16:30-ին (Երևանի ժամանակով` 17:30֊ին) Ստամբուլի Դոլմաբահչե պալատում գտնվող Թուրքիայի նախագահի աշխատանքային գրասենյակում։

Հանդիպմանը, պաշտպանության նախարարներից բացի, կմասնակցեն նաև Թուրքիայի նախագահ Ռեջեփ Թայիփ Էրդողանը և ՄԱԿ-ի գլխավոր քարտուղար Անտոնիո Գուտերեշը։

ՄԱԿ-ի, ինչպես նաև Ռուսաստանի, Թուրքիայի և Ուկրաինայի պատվիրակությունների մասնակցությամբ առաջին բանակցությունները ուկրաինական հացահատիկի սևծովյան նավահանգիստներից դուրս բերելու վերաբերյալ կայացել են հուլիսի 13-ին՝ Ստամբուլում։

Հանդիպումից հետո ՄԱԿ-ի գլխավոր քարտուղար Անտոնիո Գուտերեշը հայտարարել է, որ ուկրաինական հացահատիկի մատակարարումը վերականգնելու շուրջ բանակցությունները «չափազանց հուսադրող են», սակայն վերջնական համաձայնություն չկա։

Ավելի վաղ ՌԴ ԱԳ նախարար Սերգեյ Լավրովը հայտարարել էր, որ Մոսկվան ազդանշան է ուղարկել ՄԱԿ-ի գլխավոր քարտուղար Գուտերեշին՝ Ստամբուլի համաձայնագրերում ռուսական հացահատիկի մասին կետ ներառելու անհրաժեշտության մասին։