Չինաստանը, Նենսի Փելոսիի՝ Թայվան կատարած այցի ֆոնին, ծով է դուրս բերել իր ավիակիրները. China Times

Չինական երկու օպերատիվ ավիակիրներ ծով են դուրս եկել Ցինդաո և Սանյա նավահանգիստներից։ Նրանք կարող են շարժվել դեպի Թայվանի նեղուցի տարածք՝ կապված ԱՄՆ Կոնգրեսի Ներկայացուցիչների պալատի նախագահի՝ Նենսի Փելոսիի հնարավոր այցի հետ, գրում է թայվանական China Times թերթը։

Ներկայում հստակ հայտնի չէ, թե ուր են ուղղվում նավերը և կմասնակցե՞ն արդյոք զորավարժություններին, սակայն Արևելյան Ասիայում ամերիկյան բազաներն արդեն պատրաստ են, գրում է թերթը։

Չինաստանի Ժողովրդաազատագրական բանակը զորավարժություններ կանցկացնի օգոստոսի 2-6-ը Հարավչինական ծովում, իսկ օգոստոսի 1-4-ը՝ Բոհայ ծոցում։

CNN-ն ավելի վաղ հայտնել էր, որ Փելոսին կայցելի Թայվան ասիական իր շրջագայության շրջանակներում՝ չնայած ԱՄՆ նախագահ Ջո Բայդենի վարչակազմի պաշտոնյաների զգուշացումներին։

Հուլիսի 26-ին Չինաստանը սպառնացել է ԱՄՆ-ին վճռական քայլերով, եթե Փելոսին այցելի Թայվան։ Չինաստանի պաշտպանության նախարարությունը զգուշացրել է, որ չինական բանակը քայլեր կձեռնարկի այս այցը կանխելու համար։