Մեծ Բրիտանիայի վարչապետի թեկնածուն սկանդալի կենտրոնում է հայտնվել

Մեծ Բրիտանիայի վարչապետի թեկնածու, արտգործնախարար Լիզ Թրասին մեղադրել են միլիոնատեր Ռոբին Բերլիի հաշվին երեք հազար ֆունտ ստեռլինգով ընթրիքը չհայտարարագրելու մեջ, գրում է The Independent-ը։

Անցյալ հոկտեմբերին Թրասը Պահպանողական կուսակցության անդամներին հրավերներ է ուղարկել, այսպես կոչված, շամպայնով ընթրիքի: Միջոցառումն անցկացվել է Լոնդոնի հեղինակավոր Մեյֆեր շրջանում գտնվող «5 Hertford St» փակ ակումբում։

Ավելի ուշ Թրասի ներկայացուցիչը հերքել է տեղեկությունը, թե ընթրիքի կազմակերպիչը ԱԳՆ ղեկավարն է։

«Ընթրիքը իր անունից կամ իր կողմից չի կազմակերպվել, նրան հրավիրել է Ռոբին Բըրլին (գործարար, ակումբի սեփականատեր-խմբ.)։ Հայտարարագրի մեջ դա պետք է գրվեր միայն այն դեպքում, եթե դա լիներ Լիզի միջոցառումը»,- ասել է Թրասի ներկայացուցիչը։

Այնուամենայնիվ, համացանցում հայտնված այս տեղեկատվությունը քննադատություն է առաջ բերել Մեծ Բրիտանիայի վարչապետի պաշտոնի թեկնածուի հասցեին` պետական ​​հատվածում աշխատավարձերի կրճատման միջոցով 11 միլիարդ ֆունտ խնայելու մասին նրա հայտարարությունների ֆոնին:

«Վերջերս մենք կորցրեցինք մեկ վարչապետի այն բանից հետո, երբ նա խախտեց կանոնները և չկարողացավ ասել ամբողջ ճշմարտությունը խորհրդարանին: Ողբերգական կլիներ, եթե պոտենցիալ վարչապետը նույնն աներ նույնիսկ Դաունինգ սթրիթ հասնելուց առաջ», - ասել է Brexit-ի նախկին նախարար Դևիդ Դևիսը: