Ուկրաինան կարող է արգելել ռուսների մուտքը երկիր

Առաջիկա 50 տարում ռուսների մուտքն Ուկրաինա արգելելու խնդրագիրը, որը գրանցված է Ուկրաինայի նախագահի կայքում, հավաքել է 25 000 ձայն: Այն պետք է վերանայվի պետության ղեկավար Վոլոդիմիր Զելենսկու կողմից։

Ստորագրահավաքի հեղինակներն առաջարկել են արգելել ռուսաստանցիների մուտքը երկիր և նրանց մուտքի վիզա չտրամադրել «յուրաքանչյուր ուկրաինացու անվտանգության համար այժմ և ապագայում»։ Հստակեցվում է, որ կացության իրավունք կարող են տրվել միայն այն ռուսաստանցիներին, ովքեր մասնակցել են ռազմական գործողություններին Ուկրաինայի կողմից։

Փաստաթուղթը գրանցվել է մայիսի 23-ին։

Հուլիսի 1-ից Ուկրաինան վիզային ռեժիմ է մտցրել Ռուսաստանի հետ։ Ռուսները կարող են դիմել ուկրաինական վիզաների համար VFS Global Visa Application Centres-ում: Դրանք գտնվում են Մոսկվայում, Սանկտ Պետերբուրգում, Սամարայում, Եկատերինբուրգում, Նովոսիբիրսկում, Դոնի Ռոստովում, Կալինինգրադում և Կազանում։ Ուկրաինայի ԱԳՆ-ն պարզաբանել է, որ վիզայի առկայությունը չի երաշխավորում ռուսաստանցիների մուտքը երկիր։