Նա կրակ է բորբոքում Ուկրաինայում. Pink Floyd-ի հիմնադիրը Բայդենին անվանել է պատերազմական հանցագործ

Բրիտանական Pink Floyd ռոք խմբի հիմնադիր, նախկին վոկալիստ Ռոջեր Ուոթերսը CNN-ին տված հարցազրույցում ասել է, որ ԱՄՆ նախագահ Ջո Բայդենը «կրակ է բորբոքում» Ուկրաինայում՝ նրան անվանելով պատերազմական հանցագործ։

This Is Not A Drill շրջագայության շրջանակներում Ուոթերսի համերգների ժամանակ էկրաններին ցուցադրվում են մարդկանց դիմանկարներ, որոնց վոկալիստը ներառել է «պատերազմական հանցագործների» ցուցակում։ Բայդենի լուսանկարի կողքին հայտնվում է «Just getting started» (Հենց նոր եմ սկսել) մակագրությունը։ Երաժիշտն իր ցուցակում ավելացրել է նաև ԱՄՆ նախկին նախագահ Դոնալդ Թրամփին։

CNN-ի լրագրողը երաժշտին հարցրել է, թե ինչու «պատերազմական հանցագործների» լուսանկարների մեջ կա ԱՄՆ նախագահի լուսանկարը։

«Նախագահ Բայդենը «յուղ է լցնում» Ուկրաինայում հակամարտության կրակի վրա․ սա ծանր հանցագործություն է։ Ինչո՞ւ ԱՄՆ-ն Ուկրաինայի նախագահ Վոլոդիմիր Զելենսկիին կոչ չի անում նստել բանակցությունների սեղանի շուրջ՝ վերջ տալու այս հրեշավոր պատերազմին»,֊ասել է Ուոթերսը։

Հեռուստահաղորդավարի այն նկատառմանը, թե Ուոթերսը ռազմական գործողությունների համար մեղադրում է սխալ կողմին, երաժիշտը պատասխանել է, որ Մոսկվայի գործողությունները պատասխան են դեպի ռուսական սահմաններ ՆԱՏՕ-ի առաջխաղացմանը։

Pink Floyd-ի նախկին մենակատարը նաև առաջարկել է լրագրողին մտածել այն մասին, թե ինչ կանի ԱՄՆ-ն, եթե չինացիները միջուկային հրթիռներ տեղադրեն Մեքսիկայում կամ Կանադայում։