Ուկրաինայում անգլերենին նոր կարգավիճակ կտրվի

Ուկրաինայի մշակույթի նախարարությունը օրինագիծ է մշակում անգլերենի նոր կարգավիճակի վերաբերյալ, հայտնում է РИА Новости-ն՝ հղում անելով մշակույթի և տեղեկատվական քաղաքականության նախարարի առաջին տեղակալ Ռոստիսլավ Կարանդեևին։

Նրա խոսքով, օրինագիծը կընդլայնի անգլերեն լեզվի կիրառման շրջանակը և թույլ կտա այն հանրային օգտագործել հասարակական կյանքի որոշակի ոլորտներում։ Կարանդեևը հավելել է, որ առանց անգլերենի հատուկ կարգավիճակի՝ Ուկրաինան և Եվրամիությունը կբաժանվեն լեզվական արգելքով։

«Ենթադրվում է, որ կկարգավորվեն հանրային կյանքի որոշ հանրային ոլորտներում անգլերենի՝ որպես միջազգային հաղորդակցության լեզու օգտագործելու հետ կապված հարաբերությունները։ Փոփոխություններ կկատարվեն կրթության մասին, հանրային ծառայության մասին օրենքում։ Այսինքն՝ ապագայում յուրաքանչյուր պետական ​​ծառայող կամ իրավապահ մարմինների աշխատակից պետք է խոսի անգլերեն»,- ասել է Կարանդեեւը։