ԱՄՆ-ն պետք է հեռացնի Թուրքիային ՆԱՏՕ-ից. The American Conservative

ԱՄՆ 40-րդ նախագահ Ռոնալդ Ռեյգանի նախկին խորհրդական և քաղաքական գրող Դուգ Բենդոուն ենթադրել է, որ երկիրը չափազանց շատ դաշնակիցներ ունի, որոնցից ոմանք միայն վնասում են իրեն։ Այդ մասին նա գրել է The American Conservative-ի իր հոդվածում։

ՆԱՏՕ-ն ունի բազմաթիվ «ռազմական առումով անպետք անդամներ», ասել է Բենդոուն, սակայն ոչ ՆԱՏՕ-ն, ոչ էլ ԱՄՆ պաշտոնյաները «չեն ընդունում ակնհայտը»: Նա նաև նշել է, որ ԱՄՆ-ը ռազմական դաշինքներին վերաբերվում է սոցիալական ցանցերի ընկերների պես՝ որքան շատ, այնքան լավ։

Բենդոուի խոսքով՝ աշխարհի երկրները փորձում են ամեն գնով դառնալ Ամերիկայի դաշնակից՝ նրա հնարավորություններն ու ռեսուրսները սեփական նպատակների համար օգտագործելու համար։

«Նայեք Ասիայի, Եվրոպայի և Մերձավոր Արևելքի պաշտոնական դաշնակիցների ցուցակը: Դրանցից նույնիսկ լավագույնները, որպես կանոն, տզրուկներ, նվնվացողներ, ծույլեր, կեցվածքամոլներ ու խարդախներ են»,- ասել է հրապարակախոսը։

Վաշինգտոնին վնաս հասցնող երկրների թվում Բենդոուն նշել է Սաուդյան Արաբիան, Հարավային Կորեան և Թուրքիան։

Նա ընդգծել է, որ Սաուդյան Արաբիան, լինելով ԱՄՆ-ի զենքի խոշորագույն գնորդներից մեկը, պետք է պաշտպանվի ձեռք բերված տեխնիկայով, այլ ոչ թե այս հարցում հույսը դնի Վաշինգտոնի վրա։

Հարավային Կորեան, ըստ Բենդոուի, ԿԺԴՀ-ի հետ առճակատման ժամանակ պետք է օգտագործի իր ռեսուրսները՝ հաշվի առնելով տնտեսական հզորությամբ իր գերազանցությունը:

Նա կոչ է արել Թուրքիային հեռացնել ՆԱՏՕ-ից, քանի որ, ըստ նրա, երկրի իշխանությունները խախտում են մարդու իրավունքները և վարում են ագրեսիվ արտաքին քաղաքականություն՝ երբեմն հակասելով ԱՄՆ շահերին։