Իրանը համաձայնել է հրթիռներ և ավելի շատ անօդաչու թռչող սարքեր ուղարկել Ռուսաստան՝ «մարտահրավեր նետելով Արևմուտքին». Reuters

Իրանը համաձայնել է հրթիռներ և ավելի շատ անօդաչու թռչող սարքեր ուղարկել Ռուսաստան՝ «մարտահրավեր նետելով Արևմուտքին», հայտնում է Reuters-ը՝ վկայակոչելով իրանցի երկու բարձրաստիճան պաշտոնյաների և երկու իրանցի դիվանագետների:

Գործարքը ձեռք է բերվել հոկտեմբերի 6-ին, երբ Իրանի առաջին փոխնախագահ Մոհամմադ Մոհբերը, Իրանի Հեղափոխության պահապանների երկու ազդեցիկ բարձրաստիճան պաշտոնյաներ և Ազգային անվտանգության բարձրագույն խորհրդի ներկայացուցիչը այցելեցին Մոսկվա՝ բանակցելու Ռուսաստանի հետ զենքի մատակարարման շուրջ։

«Ռուսները պահանջել են ավելի շատ անօդաչու թռչող սարքեր և իրանական բալիստիկ հրթիռներ՝ բարելավված ճշգրտությամբ, մասնավորապես՝ «Ֆաթեհ» և «Զոլֆագար» ընտանիքի հրթիռներ», - ասել է իրանցի դիվանագետներից մեկը:

Այդ մասին տեղեկացված արևմտյան պաշտոնյան հաստատել է դա՝ հայտարարելով, որ Իրանի և Ռուսաստանի միջև համաձայնություն կա փոքր հեռահարության «երկիր-երկիր» կլասսի բալիստիկ հրթիռներ, այդ թվում՝ «Զոլֆագար» (մինչև 700 կիլոմետր հեռահարությամբ) մատակարարելու վերաբերյալ։

Գործակալության տվյալներով՝ «հավանական է, որ դա վրդովմունք կառաջացնի ԱՄՆ-ի և արևմտյան մյուս ուժերի մոտ»:

Իրանցի դիվանագետը հերքել է արևմտյան պաշտոնյաների պնդումներն այն մասին, որ նման հաղորդումները խախտում են ՄԱԿ-ի Անվտանգության խորհրդի 2015 թվականի որոշումը, գրում է Reuters-ը։

«Թե որտեղ են դրանք օգտագործվում, դա վաճառողի հարցը չէ: Մենք ուկրաինական ճգնաժամում կողմ չենք բռնում, ինչպես Արևմուտքը: Մենք ցանկանում ենք դիվանագիտական ​​ճանապարհով վերջ տալ ճգնաժամին»,- ասել է իրանցի դիվանագետը: