ԱՄՆ պատվիրակությունը զգուշացրել է թուրքական բիզնեսին Ռուսաստանի հետ առևտրի համար պատժամիջոցների մասին. Dünya

Թուրքիա այցելած ԱՄՆ կառավարական պատվիրակությունը գործարար համայնքին զգուշացրել է Ռուսաստանի հետ առևտրի պատճառով պատժամիջոցների մասին։ Այս մասին գրել է Dünya թերթը՝ հղում անելով Անկարայում իր աղբյուրներին։

Ըստ Dunya-ի՝ ԱՄՆ կառավարության անդամները թուրքական բիզնեսի ներկայացուցիչների հետ հանդիպմանը զգուշացրել են չաշխատել 75 տոկոս ռուսական կապիտալով ընկերությունների, ինչպես նաև ռուս օլիգարխների հետ։

Թերթը գրել է, որ Անկարան մարտ ամսից թույլատրել է զուգահեռ ներմուծումներ Ռուսաստան, և դա Թուրքիան վերածել է «տրանզիտային հանգույցի», շատ ռուսական ընկերություններ այստեղ բացել են իրենց ներկայացուցչությունները։

Նշվում է, որ 2022 թվականի հունվարից մինչև օգոստոս Թուրքիայում ռուսական կապիտալով նորաստեղծ ընկերությունների թիվը տարեկան կտրվածքով աճել է չորս անգամ։ Ընդհանուր առմամբ, այս ընթացքում հանրապետությունում աշխատանք է սկսել 729 նման ձեռնարկություն։