Ալիևի ռեժիմը որոշեց հանել ևս մեկ դիմակ և ավելի բացահայտ ցույց տալ իր ցեղասպան դեմքը. Արտակ Բեգլարյան

Լաչինի միջանցքում գտնվող ապօրինի անցակետից Կարմիր խաչի ուղեկցությամբ Հայաստան բուժման մեկնող 68-ամյա Վագիֆ Խաչատրյանին առևանգելով՝ Ադրբեջանը թեւակոխեց արցախցիների ցեղասպանության հերթական փուլ։ Այս մասին Տելեգրամի իր ալիքում գրել է Արցախի նախագահի խորհրդական Արտակ Բեգլարյանը:

«Իրականում այս փուլի մեկնարկի ազդանշանը Հաջիևի՝ «Խաղն ավարտված է» արտահայտությունն էր։ Ալիևի ռեժիմը որոշեց հանել ևս մեկ դիմակ և ավելի բացահայտ ցույց տալ իր ցեղասպան դեմքը։

Իհարկե, նրանք արդեն սկսել են արդարանալ՝ խոսելով այս անձի կողմից իբր կատարված «հանցագործությունների» մասին։ Բայց ադրբեջանական կողմը մոռանում է, թե 1988 թվականին ինչ ցեղասպանական հանցագործություններ է կատարել հայ ժողովրդի նկատմամբ։ Սկսած նրանից, երբ 1991-1992 թվականների զանգվածային գնդակոծությունների ժամանակ ամիսներ շարունակ շրջափակման մեջ էր պահում Արցախի ժողովրդին, վերջացրած ցեղասպանական հանցագործություններով, որոնք իրականացվում են ներկայումս։

Արդյո՞ք սա են Ադրբեջանի, Հայաստանի և միջազգային հանրության առաջարկած իրավունքներն ու անվտանգությունը։ Դադարեցրեք ադրբեջանական ցեղասպանության քաղաքականությունը և Արցախը Ադրբեջանին ենթարկելու խաղը, այլապես դուք բոլորդ անխտիր մեղավոր կլինեք գալիք ցեղասպանության համար։

Իսկ ԿԽՄԿ-ն կլռի՞ միջազգային մարդասիրական իրավունքի այս կոպտագույն խախտման մասին։

Վագիֆ Չերքեզովիչ Խաչատրյանը ծնվել է Արցախում 1955 թվականին, ապրում է Ասկերանի շրջանի Պատարա գյուղում։ Ինչպես գրեթե բոլոր արցախցի տղամարդիկ, նա 1991-1994 թվականներին պաշտպանել է իր հայրենիքն ու անվտանգությունն ադրբեջանական ագրեսիայից։ Իսկ այսօր նրան առևանգել են Կարմիր Խաչի ներկայացուցչի և սեփական դստեր աչքի առաջ։ Նա սրտի ծանր հիվանդություն ունի, որի բուժման համար մեկնում էր Երեւան»,- գրել է նա: