Հասմիկ Պողոսյան. «Արտաշատում քաղաքային մշակույթի հասանելիության խնդիր չկա»

«Եթե Տավուշի մարզի բնակիչը ասի, որ իրենց հասու չէ քաղաքային մշակույթը, ես դեռ կհասկանամ, որովհետև մայրաքաղաքային մշակույթը մենք պետք է էնտեղ հասցնենք, բայց Արարատում չկա նման հիմնախնդիր, էստեղ և՛ թատրոն կա, և՛ գրադարան, և՛ երաժշտական դպրոց, բացի այդ՝ Արտաշատից Երևան ընդամենը 20 րոպեի ճանապարհ է»,- ԼՈՒՐԵՐ.com-ի թղթակցի հետ զրույցում այսօր նշեց ՀՀ Մշակույթի նախարար Հասմիկ Պողոսյանը:

Մշակույթի նախարար Հասմիկ Պողոսյանը, ով նույնպես եկել էր Արտաշատի 2200-ամյա տոնին մասնակցելու նաև գլխավորում է Արտաշատ քաղաքի հոբելյանական միջոցառումների պետական հանձնաժողովը:

«Գիտեք ես սա դիտարկում եմ որպես մեկնարկ՝ նորովի վերաիմաստավորելու, վերաարժեքավորելու մեր պատմությունը, այսինքն մենք շատ լավ պետք է գիտակցենք, թե ինչպիսի պատմական քաղաք ենք ունեցել և մեր ժամանակներում նույնպես ինքը պետք է ունենա նույն ձևի դիրք»,- ասեց Հասմիկ Պողոսյանը:

Ըստ նախարարի՝ քաղաքի հրապարակում բեմադրված թատերականացված միջոցառումը հաջողվեց, որովհետև «այն որպես ցերեկային բեմադրություն արեց առավելագույնը»:

«Խնդիրը դրված էր նրանում, որ պետք է ցույց տրվեր պատմական մշակութային շերտը, իսկ ես կարծում եմ, որ մշակութային հատվածը, թե պատմականորեն ինչպես է ձևավորվել թատրոնը, պատմականորեն ինչ նշանակություն է ունեցել քաղաքը մեր գրերի ընդունման հարցում լիարժեք արտացոլվեց»,- նշեց նախարարը:

Հասմիկ Պողոսյանի հավաստամամբ՝ ամենը արվում է ժողովրդի համար, իսկ եթե այսօր մարդիկ ուրախ են և ժպտում են, ուրեմն միջոցառումը ունեցավ իր հաջողությունը:

«Եկեք ես այսօր գնահատողի կարգավիճակում չլինեմ»,- իր խոսքը ամփոփեց Հասմիկ Պողոսյանը՝ կոչ անելով ներկաներին, որ ևս մեկ անգամ հպարտություն ապրեն, թե ինչպիսի քաղաքում են բնակվում: