Զրույց քանդակագործ Վանուշ Սաֆարյանի հետ

«Ես չեմ ասում շեդեվր եմ ստեղծել, ոչ, պարզապես լուծված մոնումենտալ աշխատանք եմ ստեղծել»,- ԼՈՒՐԵՐ.com-ի թղթակցի հետ զրույցում ասաց Արտաշես արքայի արձանի քանդակագործ Վանուշ Սաֆարյանը:

«Եկեք չկեղծենք, քանի որ արվեստագետները չեն սիրում կեղծել»,-ասում է Արտաշատի բնակիչ, ՀՀ նկարիչների միության անդամ Վանուշ Սաֆարյանը: Ըստ նրա յուրաքանչյուր մարզ ունի իր հիմնախնդիրները, իսկ Արարատինը գործազրկությունն ու արտագաղթն է:

«Ես չեմ կարող ասել, որ ողբերգական վիճակում է մարզի ժողովուրդը, բայց էստեղ կան գործազրկության և արտագաղթի խնդիրներ, մարդիկ շատ են գնում, իսկ գնում են, որովհետև չունեն մասնագիտական աշխատանք կամ աշխատանք ընդհանրապես»,-ցավով նշում է արվեստագետը:

Ըստ նրա` մարզի այս սոցիալական խնդիրները պետք է վերանայվեն, փորձեն շտկվել, որովհետև հատկապես երիտասարդ մտավոր զանգվածն է մեկնում երկրից, ինչը անընդունելի է:

Բայց խնդիրների հետ մեկտեղ քանդակագործը փաստում է, որ քաղաքում արվեստի ոլորտին վերաբերող բավականին մեծ բազա և աճ կա. «Ես Գեղարվեստի դպրոցի տնօրենն էլ եմ, համեմատած 10 տարի առաջվա, էսօր մեծ ձգտում կա դեպի արվեստը, Գեղարվեստի դպրոցը 3-4 հազարից ավելի շրջանավարտ է ունեցել»:

Դեռևս 2001 թ-ին Արտաշատի կենտրոնում զետեղված Արտաշես արքայի արձանի քանդակագործը նույնպես Վանուշ Սաֆարյանն է: Արվեստագետը հիշում է, երբ արձանը տեղադրվեց, մեծ քննադատության արժանացավ, իսկ հիմա մարդիկ սովորեցին տեսնել այն, գնահատել և ընկալել:

«Նախ սոցռեալիզմից ես լուծումները տվեցի մոնումենտալ ազգային ժանրին, անկախության շրջանում ես ավելի ազատ, անկախ, ավելի հետաքրքիր լուծում տվեցի, իսկ ժողովրդին դա հանկարծակիի բերեց, որովհետև սա լրիվ միջնադարյան ոճ էր, կոլորիտը, ընդհանրացումները, ազգային արմատների հիմքի վրա կարողացա ստեղծել իմ Արտաշեսը»,- պատմում է արվեստագետը:

Նրա կարծիքով, Արտաշես արքայի արձանը քաղաքի անբաժան մասնիկն է, այդ ստեղծագործությունը այլ տեղում չէր ունենա այն ուժը, որն այժմ քանդակը հաղորոդում է քաղաքին: «Չեմ ասում շեդեվր եմ ստեղծել, ո'չ, պարզապես լուծված մոնումենտալ աշխատանք եմ ստեղծել»,- ասում է քանդակագործը:

Վանուշ Սաֆարյանը խանդավառությամբ խոսեց նաև քաղաքում հոբելյանական միջոցառումների անցկացման մասին, մեր թղթակցին անձամբ ուղեկցելով Արտաշատի քաղաքային այգի` ցույց տվեց իր սաների տարաբնույթ ստեղծագործությունները:

«Արվեստագետները մանկան մտածողություն ունեն, էսպիսի բաներից շատ են խանդավառվում, բավականին մոնումենտալ հզոր միջոցառում է, իսկ մարդիկ շաբաթներ շարունակ սպասել են էս տոնին»,- նշեց Վանուշ Սաֆարյանը: