8 գյուղերը հանձնվելու են Ադրբեջանի՞ն․ սահմանազատման հանձնաժողովի օրակարգը հայտնի է․ «Հրապարակ»

«Հայաստանի և Ադրբեջանի սահմանազատման պետական հանձնաժողովների հանդիպման օրակարգում հանձնաժողովների աշխատանքի կանոնադրությունն է, Ալիեւի հայտարարություններին նույնպես անդրադարձ եղել է»,-հայկական 8 գյուղերը Ադրբեջանին հանձնելու Ալիեւի հայտարարությունների մասին «Հրապարակ»-ի հարցին ի պատասխան ասաց ՀՀ ԱԳ փոխնախարար Մնացական Սաֆարյանը։ Փոխնախարարը հրաժարվեց մեկնաբանել Ալիեւի այն հայտարարությունը, թե օրակարգ է մտել հայկական գյուղերի հանձնման հարցը։

Կայքը հետաքրքրվել է, թե խաղաղության պայմանագրի տեքստի հետ կապված հայկական կողմն իր առաջարկներն ուղարկե՞լ է, գնդակն ու՞մ դաշտում է՝ Ադրբեջանի՞, թե՞ Հայաստանի, Մնացական Սաֆարյանն ասաց՝ «այս պահին չի կարող պատասխանել»։ 

Դիտարկմանը, որ Ալիեւը պարբերաբար փոխում է իր հռետորաբանությունը, նոր պահանջներ է ներկայացնում, հայկական 8 գյուղերի մասին է խոսում, ասում է՝ Ջերմուկը, Երեւանը եւ այլ հայկական բնակավայրեր իրենցն են, որպես դիվանագետ ի՞նչ է կարծում՝ առանց հայկական կողմի նոր զիջումների՝ խաղաղության պայմանագիր կկնքվի՞, փոխնախարարն ասաց․ «Մենք շարունակում ենք գործընթացը, եւ հայտարարության մեջ դրան անդրադարձ եղել է։ Մեր մոտեցումների մասին շատ հստակ արձանագրել է վարչապետը եւ իմ կարծիքը համընկնում է մեր պաշտոնական դիրքորոշմանը»։

Մանրամասները՝ «Հրապարակ»-ի տեսանյութում։