Կլինեն առարկաներ, որոնք այս տարի դասագրքեր չեն ունենա. ԿԳՄՍ փոխնախարար

Այս ուսումնական տարում ՀՀ հանրակրթական դպրոցներում որոշ դասագրքեր չեն լինի։

Սպուտնիկ Արմենիայի փոխանցմամբ, տեղեկությունը հայտնեց ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը։

Նրա խոսքով` հանրակրթական բոլոր դպրոցներին ԿԳՄՍՆ–ն արդեն շրջաբերական է ուղարկել։

«3 առարկայից այս տարի չունենք դասագրքեր, բայց հին դասագրքերով դասավանդել հնարավոր չի լինի, որովհետև այս առարկաների դասագրքերն ամբողջությամբ փոխվել են։ Մասնավորապես չունենք դասագրքեր «Թվային գրագիտություն և համակարգչային գիտություն» 7–րդ և 8–րդ դասարանների համար։ Մեկ դասագիրք էինք ստացել նույն հեղինակից, որը նույնիսկ լրամշակումից հետո հնարավոր չեղավ երաշխավորել, որովհետև միավորները բավական ցածր էին։ Այս առարկաների դասավանդումը պետք է կազմակերպենք Տավուշում փորձարկված ուսումնական նյութերի միջոցով։ Նոր մրցույթ արդեն հայտարարել ենք, հույս ունենք` առաջիկայում դասագիրք կունենանք։ Դասագիրք չունենք նաև 10–րդ դասարանների համար նախատեսված «Հայոց պատմություն» առարկայից»,–ասաց Սվաջյանը։

Նրա խոսքով` նախարարությունը հատուկ վերապատրաստում է կազմակերպել «Հայոց պատմություն» առարկան 10–րդ դասարանում դասավանդող 1500 ուսուցիչների համար։

«Արդեն իսկ մեկնարկել են վերապատրաստումները։ Ուսուցիչներին կտրամադրվեն ուսումնական նյութեր, և ողջ ուսումնական տարում լինելու է մենթորական աջակցություն»,–ասաց Սվաջյանը։

Նա ընդգծեց, որ ուսուցիչների նման փորձը կարևոր է, քանի որ ավագ դպրոցներում նոր չափորոշիչով ուսուցումը լինելու է ոչ միայն դասագրքերով, այլև ուսումնական նյութերի թղթապանակներով։