Ուկրաինան Խարկովի վրա հարձակմանը պատասխանել է Բելգորոդի գնդակոծմամբ. ավելի քան 10 մարդ վիրավորվել է

Ուկրաինան գնդակոծել է Բելգորոդը Խարկովի վրա Ռուսաստանի հարձակումից մեկ ժամ անց։ Այրվել են բազմաբնակարան շենքի պատշգամբն ու ավտոմեքենան։ Ըստ նախնական տեղեկությունների, տուժել է 11 մարդ, այդ թվում՝ երկու երեխա, հայտնել է Բելգորոդի նահանգապետ Վյաչեսլավ Գլադկովը։ Գրում է news.am-ը։

Միաժամանակ, ուժայիններին մմերձավոր  Baza տելեգրամյան ալիքը գրում է 12 տուժածի, այդ թվում՝ ծայրահեղ ծանր վիճակում գտնվող երկու երեխայի  մասին։ Տղաներից մեկը ունի որովայնի խոռոչի թափանցող բեկորային վերք և աջ ոտնաթաթի բաց կոտրվածք, երկրորդը՝ երկու ոտքերի լայնածավալ վերքեր։ Երկու երեխաներն էլ վիրահատարաններում են։

Հրթիռներից մեկն ընկել է ճանապարհին՝ Բելինսկի փողոցում գտնվող ֆուտբոլային մանեժյի տարածքում։ Ջարդվել են նաև 14 բազմահարկ շենքերի 22 բնակարանների ապակիները, իսկ բեկորներից վնասվել է 21 ավտոմեքենա։ Վնասվել են 8 առանձնատների տանիքները, ճակատները, պատուհաններն ու ցանկապատերը։

Եվս մեկ մարդ տուժել է Բելգորոդի շրջանի Մայսկի գյուղում ՀՕՊ միջոցներով գրոհը հետ մղելու ընթացքում։ Ըստ Գլադկովի, շտապօգնության բրիգադը  գլխի բեկորային վնասվածք ստացած տղամարդուն տեղում անհրաժեշտ օգնություն է ցուցաբերել, նա հրաժարվել է հոսպիտալացումից.

Կիրակի կեսօրին Ռուսաստանը զանգվածային հարձակում է իրականացրել Խարկովի վրա՝ օգտագործելով առնվազն յոթ բալիստիկ հրթիռ։ Տուժել է 41 մարդ, այդ թվում՝ հինգ երեխա։ Վնասվել են քաղաքացիական ենթակառուցվածքները, այդ թվում՝ սպորտի պալատը, «Նոր փոստի» մասնաճյուղը, սուպերմարկետը, երկու առևտրի կենտրոն  և գազատարը։