Պատերա՞զմ, որտե՞ղ եք դուք պատերազմ տեսնում․ Փաշինյան

Հրապարակը գրում է․

Թաթա Սիմոնյանի դեմ բան չունեմ, ինչպես նաև որոշ երգիչների, որոնք զվարճացնում, այո՜, զվարճացնում են մարդկանց․․․ Պարզապես մի բան կհուշեմ․ մարդիկ հմայված են ոչ թե Թաթայի երգերով, այլ ուզում են զվարճանա՜լ․․․ Ուրախանալը  բնական կենսապահանջ է։ Այն  բնական պահանջը դուրս է մղվում  այն ժամանակ, երբ հայրենիքդ վտանգի մեջ է՝ տարածքները հանձնվում և պետականությունդ կորցնելու շեմին քե՜զ զվարճացնում են, ասել է թե՝ քնեցնում են։ Ինչու՞ չեմ խոսում ձեր զվարճանալու մասին, այլ խոսում եմ զվարճացնելու մասին։ Որովհետև իմ սիրելի, շատ սիրելի մարդիկ, դուք ոչ թե զվարճանում, այլ ձեզ զվարճեցնում է՝ պետության գլխին բազմեցված մեկը, ով ներառել է ձեզ իր ծրագրի մեջ։ Հիմա կասեք՝ անպատասխանատու հայտարարություն եք անում։ Դա ես չեմ ասում։ Դա ասում է Հայաստանի Հանրապետության 16-րդ վարչապետ Նիկոլ Փաշինյանը՝ իր «Երկրի հակառակ կողմը» գրքում։ Ըստ հեղինակի՝ նա գիրքը գրել է, երբ Հայաստանում 2008 թվականի մարտի 1-ի լույս 2-ի գիշերը տեղի ունեցած զանգվածային անկարգությունների կազմակերպման համար գտնվում էր հետախուզման մեջ։ Ըստ գրքի խմբագրի՝ այն գաղափարական առումով «թավշյա հեղափոխության» նախապես գրված ծրագիրն է։ Հայաստանի վարչապետ դառնալուց հետո Նիկոլ Փաշինյանը ֆեյսբուք սոցիալական ցանցի իր էջում հայտարարել է, որ դրա միջոցով ինքն ասում է այն ամենը, ինչը, վարչապետ լինելով այժմ չի կարող ասել։ Նա դեռ  2008-ին տեսնում էր այդ պատերազմը, տեսնում էր մեր տասնյակ հազարավոր զոհերին ու հաշմանդամներին և գիտեր, որ ինքը պետք է, որ կարողանա խայտառակ, պատերազմը մոռացնել տա՝ մարդկանց իջեցնելով բարոյականության  ամենաստորին շեմին։ Ահա թե ի՜նչ է ասում․ 

«Պատերա՞զմ, ի՞նչ պատերազմ, որտե՞ղ ես դու պատերազմ տեսնում։ - Ահա, հենց այստեղ, հենց Աբովյան փողոցում, հենց Հանրապետության հրապարակի երգող շատրվանների մոտ, հենց Օպերայի սրճարաններում, ռեստորաններում, դպրոցներում, համալսարաններում, հանգստյան տներում, ոստիկանության բաժիններում, խանութներում. ամենուր, ամենուր պատերազմ է ընթանում, այդ պատերազմը խժռում է մեզ, այդ պատերազմը սպանում, գերեվարում է մեզ։ Բայց մարդիկ չեն տեսնում այդ պատերազմը, նրանք զոհվում ու գերեվարվում են այդ պատերազմում, բայց չեն տեսնում պատերազմը... »։

Այո՜, սիրելի զանգված, դուք պատերազմը չեք տեսնում, որովհետև առանց պատերազմի է հանձնվում մեր երկիրը, խրախճանքը կուրացրել է ձեզ, որովհետև կորստի պահին ձեզ ներարկել են խրախճանքի թույնը և ներարկողն ասում է․ 

«Ես տեսնում էի այդ պատերազմը. այն ծվարել էր հարմարավետ սրճարանների, աղմկոտ ռեստորանների, գիշերային ակումբների, կառուցվող շենքերի, զզվելի առանձնատների, արարողակարգային ժպիտների, մեծ ծծերի, հաստ հետույքների, անամոթ խրախճանքի ետեւում։ Ես տեսնում էի այդ պատերազմի զոհերին` բոզացած եւ դրանից երջանիկ աղջիկների, բոզացած եւ դրանից հպարտ տղաների, բոզացած եւ դրանից շոյված մայրերի, բոզացած եւ դրանից արծվացող հայրերի տեսքով։ Զգում էի, որ ինքս էլ սկսում եմ բոզանալ եւ գուցե շուտով նույնքան հպարտ կզգամ ինքս ինձ, որովհետեւ հաղթածի բանակում կլինեմ, կդառնամ խորհրդանիշը այդ պատերազմում բոզության վերջնական եւ անշրջելի հաղթանակի»։

Ինքը տեսնում էր, գիտեր այդ պատերազմի մասին և պատկերացնում էր, թե ձեզ ինչպիսին  է դարձնելու։ Հիմա եկել ու վայելում է այն տեսիլքը, որը իրականություն է դարձրել։ 

Հիշեցնենք, որ Գյումրու Վարդանանց հրապարակում երեկ տեղի ունեցավ «Ֆեստիվառ» երաժշտական-զբոսաշրջային փառատոնը: Ամենագունեղ և երաժշտական տոնի առաջին կանգառում տեղի ունեցավ Թաթա Սիմոնյանի համերգը: