Փաշինյանի այցին ընդառաջ՝ Չարենցավանում արտակարգ անվտանգային միջոցառումներ են եղել. ՆԳ նախարարը խոստացել է հանդիպել ակցիայի մասնակիցներին

Չարենցավանում անձնագրային բաժինը փակելու որոշման դեմ բողոքող քաղաքացիները, որոնք նախօրեին ակցիա էին իրականացնում Երևան-Չարենցավան ճանապարհին՝ նշում են, որ իրենց ակցիան հասել է նպատակին։ «Փաստինֆոյի» հետ զրույցում ակցիայի կազմակերպիչ Գևորգ Հակոբյանը նշեց, որ մինչ Նիկոլ Փաշինյանի ավտոշարասյան անցնելը՝ Չարենցավան է ժամամանել ՆԳ նախարար Վահե Ղազարյանը։

«Ղազարյանի գալուց հետո՝ մեզ է մոտեցել Կոտայքի ոստիկանապետն ու հայտնել, որ ՆԳՆ նախարար Վահե Ղազարյանն առաջիկայում կհանդիպի մեզ հետ։ Նա ասաց, որ առաջիկայում Ղազարյանը գալու է Կոտայքի մարզ և պատրաստ է հանդիպել մեզ։ Գուցե դրանով փորձում էին լարվածությունը թուլացնել, ամեն դեպքում մեր պահանջը նույնն է՝ վերադարձնել անձնագրայինը, կահավորել ու վերանորոգել տարածքը»,- ասաց բնակիչը։

Հակոբյանը նաև նշեց, որ նախօրեին ճանապարհին նստացույց էր անում մոտ 10 մարդ, սակայն ոստիկանական ուժերը, որ կենտրոնացվել էին՝ մի քանի անգամ ավելի էին։

«Ոստիկանական ուժերը ոչ միայն Չարենցավանի ճանապարհին էին, այլ ողջ քաղաքում, ընդ որում՝ ոչ միայն մեր քաղաքի ոստիկաններն էին, այլ ամբողջ Կոտայքի մարզի՝ Աբովյանի, Հրազդանի ոստիկաններն էին, ԱԱԾ աշխատակիցներ, կարմիր բերետավորներ էին ամբողջ քաղաքում։ Բոլոր 4 փողոցները, որ տանում էին այն ռեստորան, որտեղ հարսանիքի էր մասնակցում Նիկոլ Փաշինյանը փակ էր։ Մարդկանց տեղաշարժը քաղաքում ամբողջությամբ կաթվածահար էր։ Անգամ, երբ ընկերս իր կիթառով փորձել է մտնել իր արվեստավոց, որը ռեստորանի հարևանությամբ է՝ ոստիկանները խուզարկել են, մտածել են, կիթառի փոխարեն զենք է»։