Վիեննայում Թեյլոր Սվիֆթի համերգները չեղարկվել են. նշվում է պատճառը (լուսանկարներ)

Ամերիկացի երգչուհի Թեյլոր Սվիֆթի երեք համերգները Վիեննայում, որոնք պետք է կայանային հինգշաբթի, ուրբաթ և շաբաթ օրերին, չեղարկվել են Ավստրիայի մայրաքաղաքում ահաբեկչություններ նախապատրաստելու մեջ կասկածվող երկու անձանց ձերբակալությունից հետո։

««Էռնստ Հափել» մարզադաշտում ծրագրված ահաբեկչության մասին պաշտոնյաների հաստատման պատճառով՝ մենք այլ ելք չունենք, քան բոլորի անվտանգության համար չեղարկել ծրագրված երեք համերգները: Բոլոր տոմսերը կվերադարձվեն 10 աշխատանքային օրվա ընթացքում»,- ասվում է Barracuda Music-ի տեղական կազմակերպիչների հայտարարության մեջ:

Ավելի վաղ Ավստրիայի ՆԳՆ հանրային անվտանգության տնօրինության ղեկավար Ֆրանց Ռուֆը հայտնել էր, որ Տերնից քաղաքում ձերբակալվել է Ավստրիայի 19-ամյա քաղաքացի՝ հարձակումներ նախապատրաստելու կասկածանքով։ Վիեննայում ևս մեկ մարդ է բերման ենթարկվել, սակայն իշխանությունները նրա մասին տեղեկություն չեն տրամադրել։

«Մենք պարզել ենք, որ եղել են համապատասխան նախապատրաստական ​​գործողություններ, և որ 19-ամյա կասկածյալը թիրախավորել է Թեյլոր Սվիֆթի համերգները Վիեննայում։ Հետաքննության տվյալներով՝ երկու կասկածյալներն էլ նույնականացվել են համացանցում»,- ասել է Ռուֆը։ Նրա խոսքով՝ 19-ամյա ձերբակալված տղամարդը «հուլիսի սկզբին հավատարմության երդում է տվել «Իսլամական պետություն» խմբավորմանը։

Ռուֆը նաև հայտնել է, որ կասկածյալի տնից քիմիական նյութեր են առգրավվել և ուղարկվել փորձաքննության։