«Սպասում ենք արդար դատի». 2 տարի է, ինչ Միքայել Արզումանյանը անազատության մեջ է

MediaHub- գրում է․

Այսօր լրանում է 2-րդ տարին, ինչ Արցախի ՊԲ նախկին հրամանատար Միքայել Արզումանյանը կալանքի տակ է։ Հարազատներն ու պաշտպանները պնդում են՝ ապօրինի:

Նրան մեղադրանք էր ներկայացվել 2020 թվականի 44-օրյա պատերազմի ընթացքում ռազմավարական կարևոր նշանակություն ունեցող «Արեգասար» բարձունքը և հարակից մարտական դիրքերն ազատագրած անձնակազմին իբր «նահանջ» հրաման տալու համար։

Քույրը՝ Ծովինար Խաչատրյանը MediaHub-ին ասաց, որ հիմնական պատճառը, որի համար մեղադրվում է Արզումանյանը, մինչ օրս ապացուցված չէ։ 

«Հակառակը, մի քանի անգամ դա հերքվել է, արդարացվել, որևէ ապացույց այդ մասով չի եղել։ Իսկ իրավապահ համակարգը շարունակ նրան փակի տակ է պահում, ամեն անգամ պատճառաբանելով, թե «դեռ վկաներ կան, որոնց հետ պետք է  առանձին հանդիպումներ ու հարցաքննություն իրականացնենք»։ 2 տարի է անցել, քննությունը դեռ ավարտված չէ, ու 3 ամիսը մեկ կալանքը երկարացնում են»,- նշեց մեր զրուցակիցը։

Քրոջ խոսքով՝ Արզումանյանի անազատության մեջ գտնվելը անմիջական քաղաքական նպատակ ունի։ Միքայել Արզումանյանի դեմ հետապնդումները սկսվել են 2020 թվականի պատերազմից անմիջապես հետո, քանի որ «Արեգասար» բարձունքի անկման ու հետգրավման գործողությունների մասնակիցներից իրար հակասող կարծիքներ են հնչել։ 

«Այսօր արդեն 2 տարի է, ինչ սպասում ենք արդար դատի, որը ոչ միայն ուշանում է, այլ ուղղակի չկա»,- հավելեց նա։