Մեկ օրում՝ 3 վարկ․ Փաշինյանի կառավարությունը պետությունը պարտքի տակ գցելու ռեկորդներ է սահմանում

Կառավարությունը այսօրվա՝ հուլիսի 25-ի նիստում հավանություն կտա հերթական վարկային համաձայնագրին, այս անգամ՝ «Հայաստանի Հանրապետության ու Վերակա­ռուցման և զարգացման եվրոպական բանկի միջև «Սյունիքի մաքսային և լոգիստիկ կենտրոն» վարկային համաձայնագիրը վավերացնելու մասին» նախագծին։

Հայաստանի Հանրապետության ու Վերակառուցման և զարգացման եվրոպական բանկի միջև «Սյունիքի մաքսային և լոգիստիկ կենտրոն»  վարկային համաձայնագիրը ստորագրվել է 2024 թվականի մայիսի 14-ին: Համաձայնագրով նախատեսվում է 10.000.000 եվրոյի չափով վարկային միջոցների տրամադրում Հայաստանին՝ Համաձայնագրով սահմանված Ծրագրի իրականացման համար:

Ծրագրի նպատակն է աջակցել Հայաստանին՝ ֆինանսավորելու Սյունիքի մարզում մաքսային և լոգիստիկ կենտրոնի  կառուցմանը՝ ներառյալ տեխնիկական ապահովումն ու Ծրագրի իրականացման աջակցության խորհրդատվական ծառայությունները:

Վարկը տրամադրվում է հետևյալ պայմաններով․

• վարկի արժույթ՝ եվրո,
• վարկի տոկոսադրույքի տեսակ՝ լողացող,
• վարկի տարեկան տոկոսադրույք՝ 6-ամսյա Euribor + 1% մարժա,
• վարկի սպասարկման գծով վճարումների հաճախականություն` կիսամյակային,
• միանվագ կոմիսիոն վճար՝ վարկի 1%-ի չափով, որը ենթակա է վճարման վարկային միջոցների հաշվին՝ Վարկային համաձայնագրի ուժի մեջ մտնելու ամսաթվին կամ դրան հաջորդող 7 օրվա ընթացքում,
• պարտավորության վճարի դրույքաչափ՝ տարեկան 0.5%, որը հաշվարկվում է վարկի չմասհանված գումարի նկատմամբ՝ սկսած Վարկային համաձայնագրի ստորագրմանը հաջորդող 60-րդ օրվանից,
• վարկի մարման ժամկետ՝ 15 տարի, որից արտոնյալը՝ 4 տարի. վարկի մայր գումարի մարումները փոխկապված են վարկի ամբողջ գումարին և իրականացվելու են 22 հավասարաչափ վճարումներով։

Հիշեցնենք, որ այսօրվա նիստում ևս երկու վարկային համաձայնագրի է հավանություն տրվում՝ 200 մլն և 100 մլն դոլար արժողությամբ։