Ռուսաստանում արձագանքել են ՀԱՊԿ-ից Հայաստանի դուրս գալու մասին Փաշինյանի հայտարարությանը

«Պետք է սպասել Հայաստանի վարչապետ Նիկոլ Փաշինյանի պաշտոնական հայտարարությանը Հավաքական անվտանգության պայմանագրի կազմակերպությունից (ՀԱՊԿ) դուրս գալու որոշման վերաբերյալ»,-ասել է Ռուսաստանի Դաշնային խորհրդի միջազգային հարցերով կոմիտեի նախագահ Գրիգորի Կարասինը։ Այսպես, Lenta.ru-ի հետ զրույցում սենատորը մեկնաբանել է Հայաստանի վարչապետի արձագանքը ՀԱՊԿ-ում երկրի իրավիճակի մասին ընդդիմադիր պատգամավորի նկատառմանը։

«Նման հայտարարությունները, իհարկե, ուշադրություն են գրավում, բայց երբեմն դրանք արվում են խորհրդարանում էմոցիոնալ վեճի թեժ պահին։ Ուստի մենք, որպես ՀԱՊԿ-ում Հայաստանի գործընկեր, հավանաբար պետք է սպասենք վարչապետի պաշտոնական հայտարարությանը, այլապես այդ ամենը օդում կախված կլինի և անորոշություն կստեղծի, ինչը շատ ցավալի է Հայաստանի համար՝ որպես Հավաքական անվտանգության պայմանագրի կազմակերպության անդամ»,- ասել է Կարասինը։

Ինչպես հայտնել ենք, ԱԺ–ում կառավարության հետ հարցուպատասխանին Հայաստանի վարչապետ Նիկոլ Փաշինյանն անդրադարձել է ՀԱՊԿ–ից դուրս գալու հավանականությանը:

«Դուրս կգանք: Մենք կորոշենք, թե երբ դուրս գալ: Ասում ենք, այդ ասելիքի պակա՞ս է եղել: Ձեր կարծիքով հաջորդ քայլը ո՞րն է, կարո՞ղ է հետ գնանք, ուրիշ ճանապարհ չկա»,-արձագանքելով դահլիճից ընդդիմադիր պատգամավորների արձագանքներին՝ ասել էր Փաշինյանը։