Թող ամեն մեկը նայի` ում հետ է շփվում իր երեխան. Նուրմագոմեդովը՝ Դաղստանում ահաբեկչության մասին

UFC-ի նախկին չեմպիոն Խաբիբ Նուրմագոմեդովը ցավակցություն է հայտնել Դաղստանում ահաբեկչության ժամանակ զոհերի հարազատներին։

«Ցավակցում եմ բոլոր զոհվածների ընտանիքներին և ընկերներին։ Թող Ալլահը մեզ բոլորիս պաշտպանի նման իրավիճակներից և խաղաղ երկինք պարգևի մեր գլխավերևում։ Հո'գ տարեք ձեր և ձեր սիրելիների մասին: Թող ամեն մեկը նայի իր և իր երեխաների շրջակայքը, թե ում հետ են նրանք շփվում, և թե ովքեր են նրանց շրջապատում: Հոգիներ կրթելն ավելի կարևոր է, քան մարմիններ կրթելը»,- Instagram-ին իր էջում գրել է Նուրմագոմեդովը։

Ավելի վաղ տելեգրամյան ալիքները հայտնում էին, որ ահաբեկչության մեջ կասկածվող սպանված զինյալներից մեկը կարող է լինել Խաբիբ Նուրմագոմեդովի Eagles MMA ակումբը ներկայացնող մարտիկ Գաջիմուրադ Կագիրովը։

Ինչպես հայտնել ենք, Մախաչկալայում և Դերբենտում հակաահաբեկչական գործողությունն ավարտվել է: Բոլոր հարձակվողները սպանվել  են: