Քենիայում ցուցարարները ներխուժել են խորհրդարանի շենք, տուժել է Բարաք Օբամայի քույրը

Քենիայում ցուցարարները ներխուժել են խորհրդարանի շենք, որտեղ ավելի վաղ քվեարկություն է տեղի ունեցել հարկերի բարձրացումը հաշվի առնող բյուջեի նախագծի շուրջ: 

Այս մասին, ինչպես գրում է «Արմենպրես»-ը, իրադարձությունների վայրից հայտնել է ՏԱՍՍ-ի թղթակիցը։

Քաղաքի կենտրոնում լսվել են կրակոցներ ու պայթյուններ, խորհրդարանի շենքից ծուխ է ելել։ Citizen հրատարակությունը հաղորդում է, որ ցուցարարները հրդեհել են շենքը։

Առավոտից մարդիկ սկսել են հավաքվել քաղաքի գործարար կենտրոնում, որտեղ գտնվում են վարչական հաստատությունները, այդ թվում՝ խորհրդարանը։

Ցուցարարները վանկարկել են նախագահի հրաժարականի պահանջներ։ Տեղական լրատվամիջոցները հաղորդել են, որ ոստիկանությունը կիրառել է արցունքաբեր գազ և ռետինե գնդակներ: Հաղորդվել է նաև մարտական փամփուշտների կիրառման մասին, ինչի հետևանքով մի քանի մարդ զոհվել է:

Ըստ CNN-ի՝ հարկերի բարձրացման դեմ բողոքի ցույցերի ժամանակ Նայրոբիում արցունքաբեր գազից տուժել են ԱՄՆ նախկին նախագահ Բարաք Օբամայի քույրը՝ Աումա Օբաման, և նրա դուստրը։

Հավելյալ հարկերի սահմանման դեմ բողոքի ակցիաներն սկսվել են հունիսի 18-ից և տարածվել ամբողջ երկրում։ Հանրահավաքներ են տեղի ունենում Կիսումու, Նյերի, Նակուրու, Էլդորեթ, Քիլիֆի և Մոմբասա խոշոր քաղաքներում։ Բողոքի ցույցերի ընթացքում մահացել է երկու մարդ, առնվազն 200-ը` տուժել։ Ցուցարարները հայտարարում են, որ նորամուծությունը վնաս կհասցնի տնտեսությանը և կբարձրացնի ապրուստի ծախսերը քենիացիների համար, որոնք առանց այդ էլ դժվարությամբ են հոգում առօրյա կարիքները: