Չի կարելի թույլ տալ ԵՄ-ին անդամակցության հանրաքվեի անցկացում. Ավետիք Իշխանյան

«Եվ փոխանակ պայքարեն, որ Հայաստանը դառնա ժողովրդավարական, իրավական պետություն, նրանք ծափահարում են դատարանների կազմաքանդմանը, քաղաքական հետապնդումներին»,- «Առավոտի» զրուցակիցն է «Հայաստանի հելսինկյան կոմիտե» ՀԿ-ի նախագահ Ավետիք Իշխանյանը: – Ժողովրդավարական ուժերի պլատֆորմ ձեւավորած քաղաքական ուժերը, նրանց միացած ՀԿ- ները եւ անհատները իշխանությունից պահանջում են աշնանը հանրաքվե անցկացնել Հայաստանում` ԵՄ-ին անդամակցության հարցով։

Ինչպե՞ս եք վերաբերվում այդ գաղափարին, մանավանդ որ, ձեր ղեկավարած հասարակական կազմակերպությունն այդ պլատֆորմին միացած Արեւելյան գործընկերության հայաստանյան պլատֆորմի անդամ էր։ – Այդքան միամիտ են, որ այս ամենը չեն հասկանում։ ԵՄ-ին անդամակցության քողի տակ նրանք տանում են պատվիրված հակառուսական քարոզչություն։ Ինչ վերաբերում է մեր՝ «Հայաստանի հելսինկյան կոմիտե» ՀԿ-ին, ապա մենք եղել ենք ԵՄ «Արեւելյան գործընկերության» ակունքներում, գործընկերության քաղհասարակության պլատֆորմի հիմնադիր անդամ։ Նշեմ, որ 2007 թվականին Բրյուսելում կայացած ԵՄ -Արեւելյան գործընկերության հիմնադիր համաժողովին, Հայաստանից ներկա էինք ես ու արտգործնախարար Վարդան Օսկանյանը։

Արդեն, երկար տարիներ, ես եւ մեր կազմակերպությունը չենք մասնակցում պլատֆորմի գործունեությանը։ Պարզվեց, որ այդ պլատֆորմի եթե ոչ բոլոր, ապա անդամների գերակշիռ մասի համար կարեւոր են ոչ թե ԵՄ-ի կողմից հռչակված՝ ժողովրդավարություն, իրավական պետություն, մարդու իրավունքներ արժեքները, այլ միայն ու միայն իրենց անձնական, նյութական շահը։ Հակառակ դեպքում, նրանք առնվազն չէին լռի Հայաստանում կատարվող աղաղակող անօրինականություններին ականատես լինելիս։ Եվ փոխանակ պայքարեն, որ Հայաստանը դառնա ժողովրդավարական, իրավական պետություն, նրանք ծափահարում են դատարանների կազմաքանդմանը, քաղաքական հետապնդումներին։