Փաշինյանն այսօր պարեց ԱԺ ամբիոնում, տիկտոկյան աստղ է դարձել, ամեն ինչ անում է, բացի իր խոստացածից. Մամիջանյան (տեսանյութ)

Երբ մի քանի շաբաթ առաջ այս ամբիոնից Նիկոլ Փաշինյանը որոշեց տեկտոնիկ ոճի պարի շարժումներ հիշեցնող գործողություններով նկարագրել քիվեսթյան բանակցությունները և դարձավ Տիկտոկյան աստղ, ես մտածում էի էլ ոչ մի բանի վրա չեմ զարմանա, բայց այսօր Նիկոլ Փաշինյանը որոշեց բառիս բուն իմաստով պարել ՀՀ Ազգային ժողովի ամբիոնից: Այս մասին այսօր՝ ապրիլի 15-ին, ԱԺ-ում հայտարարությունների ժամին իր ելույթում նշեց «Պատիվ ունեմ» խմբակցության ղեկավար Հայկ Մամիջանյանը:

«Ընդ որում, ինքը պատկերացնում էր, որ իր ձեռքում կտրած գլուխ է, մարմնի այլ մասեր: Դե մարդու ներաշխարհի մասին մեկնաբանություններ ես չեմ անի, մեր քաղաքացիները դա շատ լավ գիտեն։ Փաշինյանը ամեն ինչ է անում, հեծանիվ է քշում, Ադնակլասնիկի ստատուսները հավաքում է իրար գլուխ, համարում է, որ գաղափարախոսություն է գեներացրել, փոդքասթ է անում, անում է ամեն ինչ, բացի իր խոստացածից՝ չի հրապարակում բանակցային փաթեթները։

Ես ուզում եմ հասկանալ, մարդ, որը կառավարության նիստին հրապարակել է Հայաստանի ստրատեգիական ռեզերվը, դա գաղտնիք չէր համարում, այստեղ ինքը գաղտնիք է տեսնում։ Ճաշ եփելը իրենց, քնել, զարթնելը, սափրվելը ցույց են տալիս, իսկ այն,, ինչը որ ժողովուրդը պիտի իմանա, չեն ուզում ցուցադրեն։

Կարծում եմ հիմնավոր կասկած կա, որ դուք պարզապես վախենում եք, որ երբ որ հրապարակվեն բանակցային փաթեթները, էլ էդ բոյի սուտ չեք կարողանա հորինեք, որպեսզի ձեզ արդարացնեք: Բայց մի կասկածեք ինքներդ ձեր վրա, դուք ցանկացած սուտ կարող եք հորինել»,-ասաց Մամիջանյանը:

Նա նկատեց, որ նույն ճակատագրին է նաև արժանացել 44-օրյայի հետաքննությունը իրականացնող պառլամենտական հանձնաժողովը, որը ինքնին աբսուրդ էր, որովհետև երբ մեղավորները քննում են հանցագործությունը, դա ինքն իրենով աբսուրդ է. «Բայց ամեն դեպքում դա օրենքի պահանջ է, հրապարակեք, թե՞ ձեզ մենակ շոուն էր հետաքրքրում, որ կարողանաք հայոց բանակի վրա գցեք 44-օրյայի պարտության մեղքը, նախկինների վրա գցեք:

Թե՞ կարող է հանկարծ պարզվի, որ 44-օրյայի ընթացքում, եթե մեր սպառազինությունների պլանը չփոխեիք ու ՀՕՊ-եր առնեիք, ԱԹՍ-ներ առնեիք սելֆի ՍՈՒ-երի փոխարեն, ապա արդյունքը այլ կլիներ: Թե՞ կարող է Իսկանդերի կիրառումը ճիշտ ժամանակին և ճիշտ տեղում այլ արդյունքի բերեր։ Չնայած դժվար դուք վերջապես հանդգնություն ունենաք դա հրապարակելու, ի՞նչ եմ ես ակնկալում մարդկանցից, որոնք 44-օրյա պատերազմի զոհերի ամբողջական անվանական ցանկը մինչ օրս չեն հրապարակել: Չնայած բոլորդ այստեղ նստածներից մեծ մասը քառօրյայի զոհերի թիվը 100 էիք ներկայացնում, չնայած մենք անվանական 75 զոհերը ներկայացրել էինք։

Վերջում խորհուրդ բոլորիդ՝ ինքնախոստովանական ցուցմունքը մեղմացնում է պատիժը, ավելի լավ է իմ նշած փաստաթղթերը հրապարակեք, չնայած ձեր պատիժը այնպես մեծ է, որ մեղմացնես, չմեղմացնես»,-ասաց Մամիջանյանը: