Գազան շրջափակման եզրին. Իսրայելի նոր օգնության պլանը մերժվեց

Իսրայելի առաջարկը՝ սննդային օգնությունը բաշխել Գազայի ռազմականացված գոտիներում՝ շրջանցելով ՄԱԿ-ին ու հումանիտար կազմակերպություններին, ՀԱՄԱՍ-ը անվանել է «սպառնալիք» և «քաղաքական ճնշման գործիք»։ Կազմակերպությունը պնդում է՝ օգնությունը պետք է տրամադրվի միայն միջազգային կամ տեղական իրավասու կառույցների միջոցով։ ՄԱԿ-ն ու մի շարք ՀԿ-ներ նույնպես նախազգուշացրել են, որ Իսրայելի ծրագիրը վտանգավոր է, իսկ «ռացիոններով» օգնության մատակարարումը զինված գոտիներում միայն խորացնում է հումանիտար ճգնաժամը։ Նշենք, որ վերջին ինը շաբաթում Իսրայելն ամբողջությամբ արգելափակել է սննդի մուտքը Գազա, հայտնում է Al-Jazeera-ն ։

 

Միևնույն ժամանակ, Իսրայելի ԶՈՒ շտաբի պետ Էյալ Զամիրը հայտարարել է՝ տասնյակ հազարավոր պահեստազորայիններ կկանչվեն՝ Գազայում գործողությունների ծավալը մեծացնելու նպատակով։

Գազայի առողջապահության նախարարության տվյալներով՝ Իսրայելի գործողությունների արդյունքում զոհվել է առնվազն 52,567 մարդ, ավելի քան 61,700՝ ըստ կառավարական աղբյուրների, որոնք ընդգրկում են նաև փլատակների տակ մնացած հազարավոր անհետ կորածներին։ Զոհերի գերակշիռ մասը քաղաքացիական բնակչություն է։