Հնդկաստանն ու Պակիստանը նոր բախման շեմին են. Հարվածներ, զոհեր, սպառնալիքներ

Հնդկաստանը մայիսի 7-ին հրթիռային հարվածներ է հասցրել Պակիստանին և Պակիստանի վերահսկողության տակ գտնվող Քաշմիրին՝ արձագանքելով Հնդկական Քաշմիրում ուխտավորների վրա կատարված հարձակմանը, որի հետևանքով զոհվել էր 26 մարդ։ Հնդկաստանի պաշտպանության նախարար Ռաջնաթ Սինգհը հայտարարել է, որ հարվածները եղել են «ճշգրիտ» ու «միայն ահաբեկչական թիրախների դեմ»։ Գործողությունը ստացել է «Օպերացիա Սինդուր» անվանումը, հայտնում է Reuters-ը։

 

Պակիստանը հայտնել է, որ հարվածները հասցվել են նաև քաղաքացիական թիրախների, այդ թվում՝ մզկիթի, և հայտարարվել է առնվազն 26 խաղաղ բնակչի զոհվելու մասին։ Պակիստանի բանակը հայտարարել է, որ խոցել է Հնդկաստանի հինգ ռազմական ինքնաթիռ, ինչը Նյու Դելին հերքել է։ Երկու կողմերում էլ զուգահեռ արձանագրվել է ծանր հրետակոծություն «վերահսկողության գծի» երկայնքով։ Զոհեր կան նաև Հնդկաստանի Քաշմիրում՝ առնվազն 15 քաղաքացի, 43 վիրավոր։

 

Միջազգային հանրությունն, ներառյալ ՄԱԿ-ը, ԱՄՆ-ը, Չինաստանը և Մեծ Բրիտանիան, կոչ են արել զսպվածության։Վերջին գործողությունները համարվում են ամենամեծ հարվածները 2019-ից հետո, ինչն աճող էսկալացիայի վտանգ է առաջացնում։