Թրամփը հայտարարել է Մեծ Բրիտանիայի հետ առևտրային համաձայնագրի մասին

ԱՄՆ նախագահ Դոնալդ Թրամփը հինգշաբթի օրը հայտարարել է, որ առևտրային համաձայնության է եկել Մեծ Բրիտանիայի հետ։

«Մենք պատմական առևտրային համաձայնագրի ենք հասել Մեծ Բրիտանիայի՝ մեր ուժեղ դաշնակցի հետ», - գրել է նա Truth Social-ում։

Թրամփը շեշտել է, որ սա Միացյալ Նահանգների կողմից կնքված առաջին նման համաձայնագիրն է ապրիլին իր երկրի բազմաթիվ առևտրային գործընկերների նկատմամբ լրացուցիչ մաքսատուրքեր սահմանելուց ի վեր։

Միաժամանակ, ԱՄՆ նախագահը շեշտեց, որ գործարքը չի նախատեսում բրիտանական ապրանքների վրա մաքսատուրքերի լիակատար վերացում։ «Այս գործարքի շրջանակներում Միացյալ Նահանգները 10% մաքսատուրքերից կստանա 6 միլիարդ դոլարի եկամուտ։ Բացի այդ, մենք կստանանք նոր առևտրային հնարավորություններ մեր գյուղատնտեսական արտադրողների և այլ ապրանքների արտադրողների համար։ Սա մեզ կբերի 5 միլիարդ դոլար», - բացատրեց նա։

Թրամփի խոսքով՝ կողմերը համաձայնության են եկել ստեղծել «ալյումինի և պողպատի առևտրային գոտի, ինչպես նաև ստեղծել դեղագործական արտադրանքի մատակարարման անվտանգ համակարգ»։