Ճապոնիան հերքել է Ռուսաստանի և Չինաստանի մեղադրանքները

Ճապոնիայի կառավարությունը կտրականապես համաձայն չէ միլիտարիզմի մեղադրանքների հետ, որոնցից Մոսկվան և Պեկինը կոչ են արել Տոկիոյին հրաժարվել։ Այս մասին հայտարարել է երկրի գլխավոր կաբինետի քարտուղար Յոշիմասա Հայաշին, հաղորդում է ՏԱՍՍ-ը։

«Մենք կարծում ենք, որ այն հայտարարությունները, թե մեր երկիրը պետք է հեռու մնա միլիտարիզմից, բացարձակապես սխալ են», - նշել է նա։

Նրա խոսքով՝ Ճապոնիան մտադիր է շարունակել հետևել խաղաղ պետության ուղուն, որին հավատարիմ է մնացել հետպատերազմյան տարիների ընթացքում։ Հայաշին ընդգծել է, որ այս փաստը երբեք չի փոխվի։