Աշխարհի ամենածեր մարդը՝ բրազիլացի միանձնուհի Ինա Կանաբարրոն, մահացել է 116 տարեկանում

Աշխարհի ամենածեր մարդը՝ Բրազիլիայի կաթոլիկ միանձնուհի Ինա Կանաբարրո Լուկասը, մահացել է 116 տարեկանում, տեղեկացրել է իր միաբանությունը։ Կանաբարրոն պաշտոնապես ճանաչվել էր աշխարհի ամենատարեց մարդը այս տարվա հունվարին՝ ճապոնացի Թոմիկո Իտոոկայի մահից հետո, հայտնում է Guinness World Records-ը։ Ծնվել է 1908 թվականի հունիսին՝ երբ ԱՄՆ նախագահ էր Թեոդոր Ռուզվելտը, դեռ չէր հայտնաբերվել պենիցիլինը, իսկ կինոն մունջ էր։

 

Կանաբարրոն իր երկարակեցությունը վերագրում էր հավատքին․ «Աստված է կյանքի գաղտնիքը, ամեն ինչի գաղտնիքը»,- ասել է նա։ 110-ամյակի օրը նա ստացել էր Ֆրանցիսկոս Պապի օրհնությունը։Նրա մահից հետո աշխարհի ամենածեր մարդ է ճանաչվել Անգլիայի 115-ամյա Էթել Քաթերհեմը։ Կանաբարրոն եղել է Բրազիլիայի պատմության երկրորդ ամենածեր մարդը և համաշխարհային ցանկում 15-րդ։

Աշխարհի երբևէ արձանագրված ամենածեր մարդը մնում է ֆրանսուհի Ժաննա Կալմանը՝ ապրած 122 տարի և 164 օր, փոխանցում է CNN-ը։