Թուրքիայի ՊՆ ղեկավարն Ալիևի հետ հանդիպմանը հանդես է եկել հայատյաց հայտարարություններով

Մայիսի 3-ին Ադրբեջանի նախագահ Իլհամ Ալիևն ընդունել է Թուրքիայի ազգային պաշտպանության նախարար Յաշար Գյուլերին, հաղորդում են ադրբեջանական ԶԼՄ–ները։

Հանդիպման ժամանակ Ալիևը շնորհավորել է Քրդական բանվորական կուսակցության (ՔԲԿ) ինքնալուծարման կապակցությամբ և ընդգծել, որ արդեն շնորհավորել է Թուրքիայի նախագահ Ռեջեփ Թայիփ Էրդողանին այս իրադարձության կապակցությամբ։ Ալիևը, Քրդական բանվորական կուսակցության ինքնալուծարումը «պատմական իրադարձություն» անվանելով, հայտարարել է, թե «Ռեջեփ Թայիփ Էրդողանի քաղաքական կամքը վճռորոշ դեր է խաղացել այս հարցում»։

Ալիևը նշել է, թե «այս իրադարձությունը նշանակալից է ոչ միայն Թուրքիայի, այլև ողջ տարածաշրջանի համար»։

Գյուլերը հայտարարել է, թե «մի քանի տարի առաջ, Ադրբեջանի նախագահի անսասան կամքի շնորհիվ, տարածաշրջանում հայ «ահաբեկիչները» (ադրբեջանական ԶԼՄ–ների փոխանցմամբ – խմբ․) պատմական դաս ստացան» (նկատի ունի Արցախի օկուպացիան Ադրբեջանի կողմից – խմբ․), և նշել է, թե «Թուրքիան նույնպես իր հաղթանակով ավարտեց ահաբեկչության դեմ 41-ամյա պայքարը»։ Յաշար Գյուլերը վստահություն է հայտնել, որ այսուհետ Թուրքիայում խաղաղություն կտիրի և ընդգծել է «այս իրադարձության կարևորությունը ողջ տարածաշրջանի համար»։

Թուրք նախարարը նշել է, որ Թուրքիան մտադիր է ընդլայնել կապերը Ադրբեջանի զինված ուժերի հետ։

Զրույցի ընթացքում անդրադարձ է կատարվել Ադրբեջանի և Թուրքիայի զինված ուժերի միջև արդյունավետ համագործակցությանը, ինչպես նաև ընդգծվել է համատեղ զորավարժությունների հաջող անցկացումը։ Վստահություն է հայտնվել, որ Ադրբեջանի և Թուրքիայի միջև եղբայրական և դաշնակցային կապերը կշարունակեն հաջողությամբ զարգանալ բոլոր ոլորտներում, այդ թվում՝ ռազմական ոլորտում։

Հանդիպմանը մտքերի փոխանակում տեղի է ունեցել համագործակցության հեռանկարների շուրջ։