Ռուսաստանը գոհ է Ուկրաինայի հետ բանակցություններից. Մեդինսկին հայտնել է 1000/1000 գերիների փոխանակման մասին

Ռուսաստանը ընդհանուր առմամբ գոհ է Ուկրաինայի հետ բանակցություններից և պատրաստ է շարունակել շփումները։

Այս մասին Ստամբուլում ռուս-ուկրաինական բանակցությունների ավարտտից հետո հայտարարել է ռուսական պատվիրակության ղեկավար Վլադիմիր Մեդինսկին։

Նրա խոսքով, Ռուսաստանն ու Ուկրաինան մանրամասն կներկայացնեն իրենց տեսակետները հնարավոր ապագա զինադադարի վերաբերյալ:

«Մոսկվան պատրաստ է շարունակել բանակցությունները»,- նշել է նա:

Մեդինսկին հայտնել է, որ Ռուսաստանն ու Ուկրաինան շուտով կկատարեն 1000/1000 գերիների փոխանակում։

Նա նաև նշել է, որ Ռուսաստանը հաշվի է առնում Ուկրաինայի խնդրանքը՝ առաջնորդների միջև ուղիղ բանակցություններ վարելու վերաբերյալ։

«Ռուսաստանի նախագահի նախաձեռնությամբ կազմակերպված ուղիղ բանակցությունները ուկրաինական կողմի հետ նոր են ավարտվել: Ընդհանուր առմամբ, մենք գոհ ենք արդյունքներից և պատրաստ ենք շարունակել շփումները: Ինչի՞ շուրջ պայմանավորվեցինք: Նախ՝ առաջիկա օրերին տեղի կունենա 1000/1000 գերիների լայնածավալ փոխանակում:

Երկրորդ՝ ուկրաինական կողմը խնդրել է ուղղակի բանակցություններ վարել պետությունների ղեկավարների միջև։ Մենք այս խնդրանքը հաշվի ենք առել։

Երրորդ՝ մենք պայմանավորվեցինք, որ կողմերից յուրաքանչյուրը պետք է ներկայացնի իր տեսակետը հնարավոր ապագա զինադադարի վերաբերյալ՝ մանրամասներով: Նման տեսակետի ներկայացումից հետո մենք նպատակահարմար ենք համարում շարունակել մեր բանակցությունները, և դա համաձայնեցված է», - ասել է Մեդինսկին Ստամբուլում կայացած բանակցություններից հետ: