HERMES-ը առաջ է անցել LVMH-ից՝ դառնալով աշխարհի ամենաթանկարժեք շքեղ ապրանքանիշը

HERMES-ը գերազանցել է LVMH-ին շուկայական կապիտալիզացիայով՝ դառնալով աշխարհի ամենամեծ շքեղ ապրանքանիշը: Այս շրջադարձը տեղի է ունեցել այն բանից հետո, երբ LVMH-ը հայտնել է հիասթափեցնող առաջին եռամսյակի ցուցանիշներ՝ պայմանավորված ԱՄՆ-ում և Չինաստանում նվազած վաճառքներով, հայտնում է  Reuters-ը։

 

LVMH-ի բաժնետոմսերը իջել են 7%-ով՝ հասնելով €246 միլիարդի, մինչդեռ HERMES-ի կապիտալիզացիան կազմել է €247 միլիարդ։ Վերլուծաբանները նշում են, որ HERMES-ի սահմանափակ արտադրական քաղաքականությունն ու մուլտիմիլիոնատեր հաճախորդների կայուն շերտը օգնել են ընկերությանը հաղթահարել ճգնաժամը՝ ի տարբերություն LVMH-ի միջին սեգմենտի ուղղվածության։

 

Հիմնական շքեղ ապրանքանիշները՝ Louis Vuitton, Gucci, Cartier և Prada, բոլորն էլ վերջին ամիսներին արժեզրկվել են՝ պայմանավորված վաճառքների անկմամբ ու Դոնալդ Թրամփի նախաձեռնած նոր սակագնային քաղաքականությամբ։ Վերլուծաբանները կանխատեսում են, որ շքեղ ապրանքների ոլորտը կարող է արձանագրել ամենաերկար անկումը վերջին 20 տարում։