Ուրվական կովեր և անհետացած միլիոններ. Ուրուգվայում սկանդալ է բռնկվել

Ուրուգվայի գյուղատնտեսական ներդրումային սխեմայում հարյուրավոր ներդրողներ, այդ թվում՝ հաշվապահ Սանդրա Պալեյրոն, չեն կարողանում գտնել իրենց գնած կովերին։ Ըստ փաստաթղթերի՝ նա ունի 61 գլուխ անասուն, սակայն իրականում դրանք չեն գտնվել։ Սխեման, որն առաջարկում էր ներդրում անասուններում՝ խոստանալով 7-10% եկամտաբերություն դոլարով, վերածվել է շուրջ 350 միլիոն դոլարի խարդախության գործի։ Երեք խոշոր ընկերություններ սնանկացել են և այժմ գտնվում են իրավապահների ուշադրության կենտրոնում։ Դրանցից մեկի՝ «Conexión Ganadera»-ի համասեփականատերը մահացել է՝ Tesla մեքենայով բախվելով շինարարական տեխնիկայի։ Մահը ճանաչվել է ինքնասպանություն։ Դրանից հետո բազմաթիվ ներդրողներ սկսել են նկատել ուշացումներ վճարներում և դիմել իրավապահներին։

 

Ուրուգվայի անասունների ազգային գրանցամատյանը, որը երկար տարիներ համարվել է օրինակելի՝ Հարավային Ամերիկայում, քննադատության կենտրոնում է։ Իրավաբաններն ասում են՝ հնարավոր է, որ անասունները երբևէ չեն էլ եղել, և գրանցամատյանում ներկայացված տվյալները պարզապես մուտքագրվել են առանց ստուգման։ Որոշ դեպքերում պարզվել է, որ ընկերությունը ներկայացրել է հազարավոր գլուխ անասուն՝ որպես գրավ, սակայն փաստացի առկա են եղել միայն տասնյակները, հայտնում է  Reuters-ը։

 

 

Տուժածների թվում կան շարքային քաղաքացիներ, թոշակառուներ, նույնիսկ հոգևորականներ։ Նրանք պահանջում են պարզաբանում՝ ինչպես է հնարավոր, որ պետությունը թույլ տա նման մեծ ծավալի խաբեություն՝ առանց վերահսկողության։ Պալեյրոն, ով ներդրել էր իր ողջ կենսաթոշակային խնայողությունները, ասում է. «Մենք տարիներ շարունակ խնայել ենք այս գումարները։ Հիմա ուզում ենք արդարություն»: