Բանակից եք խոսո՞ւմ. գոնե ամոթ ունեցեք. Ալեն Սիմոնյանի ելույթը՝ ԱԺ–ում (տեսանյութ)

«2000-ից 2002 թվականին ես ծառայել եմ Հայաստանի Հանրապետության բանակում, այն ժամանակ Ռոբերտ Քոչարյանը հանրապետության նախագահն էր, Սերժ Սարգսյանը պաշտպանության նախարարն էր, Սեյրան Օհանյանը առաջին բանակային կորպուսի հրամանատարն էր։ Այսինքն, մի հատ ընդհանուր բուկետ էր, ես կարող եմ ժամերով պատմել, թե ինչ էր կատարվում մեր բանակում, ինչպես էր մի սրիկա ոչնչություն կանգնում ճաշարանի դռան առջև և ռետինե բանով, մահակով 18 տարեկան երեխաներին, ովքեր մտնում էին հաց ուտելու, հարվածում էր, ուղղակի էր հարվածում, ուղղակի հարվածում էր, ուղղակի, երեխեքը եկել էին հաց ուտելու»,– այս մասին ԱԺ–ում երեկ ելույթի ժամանակ հայտարարել է ԱԺ նախագահ Ալեն Սիմոնյանը։

«Մի ուրիշ ոչնչություն գիշերը որս էր կազմակերպում, զորամասը և քաղաքը բաժանում էր պուճուրիկ մի տարածք, և գիշերը որոշ զինվորներ փորձում էին գնալ քաղաք՝ Հոկտեմբերյան քաղաք, ուտելիք հայթայթելու, պատկերացնու՞մ եք, ուտելիք հայթայթելու։ Իսկ այդ սրիկան դուրս էր գալիս որսի ու բռնում էր երեխաներին ծեծելով բերում էր, իր համար դա զբաղմունք էր։ Ի՞նչ էին կերակրում, ի՞նչ էին հագնում, այդ շորը, որ հագնում էինք, հանելուց հետո շորը տպված էր վրեքը, խմելու ջրի մասին, լողանալու մասին, ընդհանրապես չեմ խոսում, ու՞ր է Սեյրան Օհանյանը, ու՞ր է առաջին առաջին բանակային կորպուսի հրամանատարը, ու՞ր է Սերժ Սարգսյանը, պաշտպանության նախարարը, որ մեծ-մեծ խոսում են, ու՞ր են դրանք, Ռոբերտ Քոչարյանը, որ բերանը ծռելով մեծ-մեծ խոսում է, ու՞ր են։ Ու՞ր են այդ դոլարավոր միլիոնատերները, թող գան ինձ պատասխան տան։ Ամանի մեջ լցնում էին եռացրած ջուր, կտրտած կաղամբ, կներեք, որ պատմում եմ, բայց պետք է «շփցնել» այս ամենը  մեր միլիոնատերների երեսներին։ Կտրտում էին կաղամբ, կարտոֆիլ ու «Կիլկի», եռացնում էին ու տալիս էին երեխաներին։ Հաց ստանում էինք 7-10 օրը մեկ։ Ու՞ր են սրանք, ու՞ր է այդ հայր մեր չիմացող մարդը, որ մեծ-մեծ փրթում է, գիտի իր փողերը իրեն փրկելու է, հա՞»,– ասել է նա։