Սևանա լիճ է բաց թողնվել «Գեղարքունի» ենթատեսակի 437 հազար հատ մանրաձուկ
Հասարակություն
Սևանա լիճ է բաց թողնվել «Սևանի իշխան» ՓԲԸ-ի Կարճաղբյուրի ձկնաբուծական գործարանում վերարտադրված Սևանի իշխանի «Գեղարքունի» ենթատեսակի 437,000 հատ մանրաձուկ՝ 6.6 գրամ միջին զանգվածով։ Այս մասին հայտնել է ՇՄ նախարարությունը:
Բացթողնման կարևոր նախաձեռնությունն իրականացվել է Սևանա լճի ձկնային պաշարների վերականգնման և էկոհամակարգային կայունության պահպանման ծրագրերի շրջանակում։
Միջոցառմանը ներկա են գտնվել Շրջակա միջավայրի նախարարի տեղակալ Արամ Մեյմարյանը, ՇՄՆ Բնության հատուկ պահպանվող տարածքների և կենսաբազմազանության քաղաքականության վարչության պետ Ոսկեհատ Գրիգորյանը, ինչպես նաև «Սևան» ազգային պարկ» ՊՈԱԿ-ի տնօրեն Կարեն Մնացականյանը։
«Սևանի իշխան» ՓԲԸ-ի տնօրեն Տիգրան Վարդանյանը միջոցառման ընթացքում ներկայացրել է հիմնադրամի ընթացիկ գործունեությունը, իրականացվող ծրագրերը և առաջիկա նախաձեռնությունները։ Նա առանձին շեշտել է Կողակի վերարտադրության ուղղությամբ տարվող աշխատանքները, ինչպես նաև լճի գետային համակարգերում իշխանի բնական ձվադրման գործընթացների կազմակերպման և բարելավման քայլերը։
Սևանի իշխանը ոչ միայն կենսաբանական կարևոր նշանակություն ունեցող տեսակ է, այլև Սևանա լճի էկոհամակարգի հավասարակշռության, տարածաշրջանի մշակութային ինքնության և տնտեսական զարգացման առանցքային բաղադրիչը։ Հետևաբար, դրա վերարտադրությանն ու բնական պաշարների համալրմանը միտված ծրագրերը զգալի ներդրում են լճի երկարաժամկետ կայունության ապահովման գործում։
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
